«Մենք պետք է արձանագրենք, որ սա սպանություն է». Զարուհի Փոստանջյանը՝ Գեորգի Կուտոյանի մահվան մասին

«Սպանել են, թե հասցրել են ինքնասպանության, մենք պետք է արձանագրենք, որ սա սպանություն է»,- այսօր լրագրողների հետ հանդիպման ժամանակ նման կարծիք է հայտնել «Երկիր Ծիրանի» կուսակցության ղեկավար Զարուհի Փոստանջյանը՝ անդրադառնալով ԱԱԾ նախկին տնօրեն Գեորգի Կուտոյանի մահվան հանգամանքին։

Զարուհի Փոստանջյանի խոսքով՝ եթե պետությունը չի պաշտպանում մարդու կյանքի իրավունքը, պետությունն ինքն է դառնում հանցակից տվյալ հանցագործության. «2016 թվականին, երբ Սերժ Սարգսյանը հրամանագիր արձակեց և Կուտոյանին նշանակեց ԱԱԾ ղեկավար, ես այդ հրամանագիրը վիճարկել եմ Վարչական դատարանում, իհարկե, Վարչական դատարանը վարույթ չընդունեց ապօրինի կերպով: Բայց այն չափանիշները, որով պետք է նշանակվեր ԱԱԾ ղեկավարը, պարոն Կուտոյանն այդ չափանիշներին չէր համապատասխանում»։

Փոստանջյանն ընդգծել է, որ Կուտոյանը վերջին երկու տարիների ընթացքում եղել է շատ կարևոր պաշտոնի: «Այդ երկու տարիների ընթացքում կարևոր աշխարհաքաղաքական իրողություններ տեղի ունեցան նաև մեր տարածաշրջանում, և այս գաղտնիքների մասին տեղեկացված է եղել պարոն Կուտոյանը, հետևաբար՝ նրա կյանքի պաշտպանությունը պետք է հոգար պետությունը»,- ասել է նա:

Բանախոսը վստահություն է հայտնել, որ Կուտոյանը գաղտնիքներ էր տիրապետում նաև այս իշխանության հետ կապված. «Նա մասնակիցն էր ՊՊԾ գնդի բանակցությունների, ինձ համար անհասկանալի մնաց՝ ինչպե՞ս թույլ տվեցին Նիկոլ Փաշինյանին մուտք գործել ՊՊԾ գնդի տարածք, և այնտեղից ուղիղ եթերով հանդես գալ, նաև՝ ինչպես տեղի ունեցավ իշխանության փոխանցում Նիկոլ Փաշինյանին: Տեղեկացված է եղել, որ Նիկոլ Փաշինյանը գրավում է ռադիոտունը, և այդ ժամանակ ինչո՞ւ համապատասխան միջոցներ չեն ձեռնարկվել, այսինքն՝ բազմաթիվ հարցերի և տեղեկատվական դաշտի կրողը եղել է Գեորգի Կուտոյանը»։

«Երկիր Ծիրանիի» ղեկավարը նաև նշել է, որ որոշ լրատվամիջոցների նկատմամբ կան ճնշումներ. դրանք ցավալի են, բայց մեր օրերում ինֆորմացիան թաքցնել հնարավոր չէ:

«Եթե մի պետության մեջ լրատվամիջոցների նկատմամբ այսպիսի վերաբերմունք է, անպատժելի մթնոլորտ է, բարձրաստիճան պաշտոնյաներն ինքնասպանության են հասցվում կամ սպանվում են, արդեն ներդրումների մասին պետք է մոռանանք և լրջորեն մտածենք՝ որն է մեր հաջորդ քայլը, հասկանանք, որ կեղծ հեղափոխությունն այլևս ավարտված է»,- հայտարարել է Զարուհի Փոստանջյանը:

Նարեկ Կիրակոսյան