20.01.2026 | 22:24
Թուրքիայի քրդամետ կուսակցությունը հայտարարում է Սիրիայում քրդերի դեմ ցեղասպանության մասին՝ մեղադրելով Անկարային
ՀՀ-ում բարձրագույն կրթության որակը զիջում է. օլիմպիադայից վերադարձած մեդալակիրներն ուզում են բուհական կրթությունն արտերկրում ստանալ
Հասարակություն
21.01.2020 | 17:21
Հունվարի 8-14-ը Ղազախստանի Ալմաթի քաղաքում անցկացված Ժաուտիկովյան միջազգային օլիմպիադայից Հայաստանի դպրոցականները վերադարձել են 18 մեդալով: Օլիմպիադային մասնակցել է Ա.Շահինյանի անվան ֆիզմաթ դպրոցի 16 և «Քվանտ» վարժարանի 10 աշակերտ: Այսօր լրագրողների հետ հանդիպմանն այս մասին հայտնեց միջազգային օլիմպիադայում Հայաստանի թիմի ղեկավար, ֆիզմաթ դպրոցի մաթեմատիկայի ուսուցիչ Սուրեն Գրիգորյանը:
«Ֆիզմաթ դպրոցն օլիմպիադայում ներկայացված էր 16 հոգով, որոնցից 12-ը մեդալներով է վերադարձել, իսկ «Քվանտ»-ը՝ 12 աշակերտով, որոնցից մեդալներով է վերադարձել 6-ը: Այս տարի թիմային պայքարում Ֆիզմաթ դպրոցի թիմը չորրորդն էր»,- մանրամասնեց Սուրեն Գրիգորյանը:
Նա նաև հավելեց, որ միջազգային հարթակներում մեդալներ նվաճելն աշակերտների համար ճանապարհ է հարթում դեպի բազմաթիվ արտասահմանյան բուհեր՝ ընդհուպ մինչև անվճար ուսանելու հնարավորություն:
Իսկ արտերկրում ուսանելու ցանկություն շատերն ունեն: Նման ցանկության մասին հայտնեցին առնվազն մամուլիսի ասուլիսին ներկա երեք մեդալակիրները՝ Ալեքսանդր Աբելյանը, Էլեն Պետիկյանն ու Լորետա Արզումանյանը:
«Քվանտ» վարժարանի 11-րդ դասարանի աշակերտ Ալեքսանդր Աբելյանն ասում է՝ Հայաստանում բարձրագույն կրթության որակը դեռևս զիջում է. «Շատ կուզեի համալսարանական կրթությունս շարունակել արտերկրում, քանի որ այս պահին հայկական բուհական կրթությունը որոշակիորեն զիջում է: Բայց սովորելուց հետո կուզեի վերադառնալ և բարելավել այստեղի վիճակը, այստեղի ՏՏ ոլորտում աշխատել»:
Օլիմպիադայի շրջանակում մի շարք բուհեր ցուցահանդես են կազմակերպել՝ ապագա ուսանողներին առաջարկներ ներկայացնելով: «Քվանտ» վարժարանի ֆիզիկայի ուսուցիչ, թիմի ղեկավար Էդգար Վարդանյանը նշեց, որ ցուցահանդեսին մասնակցել են հիմնականում ղազախական, ռուսական և չինական համալսարաններ:
«Բայց մեր աշակերտները, մեդալակիրները մեծամասամբ դիմում են արևմուտքի համալսարաններ: Եվ քանի որ օլիմպիադաների ժամանակ ցուցաբերել են լավ արդյունքներ, նրանց դիմումները համարվում են լավը և ընդունվում են»,- նշեց ֆիզիկայի ուսուցիչը:
