22.06.2026 | 04:06
ԱԱ-2026. Ուրուգվայ – Կաբո Վերդե` 2:2. ՏԵՍԱՆՅՈՒԹ
Ինտերպոլի նախկին ղեկավարը 13.5 տարվա ազատազրկման է դատապարտվել Չինաստանում
Քաղաքականություն
21.01.2020 | 17:39
Չինաստանի հյուսիսային Տյանցզին քաղաքի ժողովրդական դատարանը 13.5 տարվա ազատազրկման է դատապարտել Ինտերպոլի նախկին ղեկավար, երկրի հանրային անվտանգության հարցերի նախկին փոխնախարար Մեն Հունվեյին: ՏԱՍՍ-ի փոխանցմամբ՝ այս մասին հաղորդել է Չինաստանի կենտրոնական հեռուստատեսությունը:
Աղբյուրի տվյալներով՝ Հունվեյը ցանկություն չի հայտնել բողոքարկել վճիռը: Նա, միաժամանակ, 2 մլն յուանի (շուրջ 292 հազար դոլար) չափով տուգանք կվճարի:
Նշենք, որ Մեն Հունվեյը մեղադրվում է կոռուպցիայի և պաշտոնական լիազորությունները գերազանցելու մեջ: Նախաքննության պնդմամբ՝ պետական պաշտոն զբաղեցնելու տարիներին նա 14.46 մլն յուանի (2.12 մլն դոլար) չափով կաշառք է վերցրել: 2018 թվականի հոկտեմբերի 7-ին Չինաստանի իշխանությունները հաղորդեցին Մեն Հունվեյի ձերբակալության մասին, իսկ երկրի Հանրային անվտանգության հարցերի նախարարությունը հայտարարեց, որ Ինտերպոլի նախկին ղեկավարին կասկածում են կաշառակերության և այլ հանցագործությունների մեջ:
Չինաստանում կոռուպցիայի դեմ պայքարն ակտիվացավ 2012 թվականին «հինգերորդ սերնդի» ղեկավարների իշխանության գալուց հետո՝ Սի Ձինպինի գլխավորությամբ: Վերջին մի քանի տարիներին լայնածավալ հակակոռուպցիոն արշավի արդյունքում պաշտոնանկ արվեցին և ճաղերի հետևում հայտնվեցին ոչ միայն շարքային պաշտոնյաներ, այլև բարձրաստիճան պաշտոնատար անձինք:
