Թաիրովի միջնակարգ դպրոցում դասապրոցեսը խաթարված է. Կառավարությունը քայլեր կձեռնարկի՞

Արմավիրի մարզի Թաիրով համայնքի միջնակարգ դպրոցում աշակերտները ստիպված են դասերն անցկացնել միջանցքներում: Պատճառն այն է, որ դպրոցի հիմնանորոգմամբ զբաղվող  «Սյունիք» ընկերությունը  աշխատանքները  դադարեցրել է:

2017 թվականի մայիսի 16-ին Արմավիրի մարզպետարանի և «Սյունիք» ընկերության միջև կնքվել է ընդհանուր առմամբ 154 միլիոն 800 հազար դրամի պայմանագիր: Նշված  գումարով մոտ 420 աշակերտի համար նախատեսված դպրոցն ամբողջությամբ պետք  է վերանորոգվի, սակայն փուլ առ փուլ:  Առաջի փուլի համար պետական բյուջեից տրամադրվել է 29 միլիոն 400 հազար դրամ: Այս գումարով կապալառուն պարտավորվել է մինչև դեկտեմբերի 20 –ը դպրոցում ավարտել շինարարական աշխատանքները:

Վերանորոգման աշխատանքներ իրականացվել են դպրոցի երեք մասնաշենքերից ընդամենը մեկում: Դպրոցի աշխատակիցները, սակայն, թերահավատ են, որ գոնե այդ մասնաշենքում սահմանված ժամկետում վերանորոգումը կավարտվի:

Արմավիրի մարզպետարանի աշխատակազմի քաղաքաշինության վարչություն պետ Կարինե Դանիելյանը մինչդեռ Factor.am-ի հետ զրույցում պնդեց՝ նախատեսված 29 միլիոնի շրջանակում  ընկերությունը շինարարական աշխատանքները կատարել է:

Դպրոցի տնօրեն Մարինե Բաղումյանը, ով հրաժարվեց տեսանկարահանվել, Factor.am-ին պատմեց, որ ի սկզբանե իրենք դիմել էին կառավարություն՝  խնդրելով վերանորոգել միայն դպրոցի տանիքը: Կառավարությունից, սակայն, որոշել են դպրոցը  հիմնովին վերանորոգել:

Լուրն, իհարկե, ոգևորել է  դպրոցի տնօրինությանը, սակայն ինչպես տիկին Բաղումյանը խոստովանեց՝ անավարտ շինարարության պատճառով այժմ կանգնել են փաստի առաջ:

Աշակերտների մի մասն ուսումնական տարվա մեկնարկից մինչ օրս դասերն անցկացնում է դպրոցի միջանցքներում՝ ազատ դասասենյակներ չլինելու պատճառով: Տնօրենը մտահոգված է՝ ցրտերն ընկնելուն պես միջանցքներում ջեռուցման բացակայության պայմաններում առաջիկայում այդ հնարավորությունից էլ կզրկվեն:

Այս մտահոգությանն ի պատասխան՝  ուշագրավ  հայտարարություն արեց Արմավիրի մարզպետարանի աշխատակազմի քաղաքաշինության վարչություն պետ Կարինե Դանիելյանը. ըստ նրա՝   ավելի բարեկարգ պայմաններ ունենալու համար պետք է  որոշակի դժվարություններ հաղթահարեն:

Դպրոցի տնօրեն Մարինե Բաղումյանը դժգոհեց նաև կատարված աշխատանքների որակից: Նրա պնդմամբ՝ տեղադրվել են անորակ և մռայլ գույներով դռներ, ինչի հետ կապված իրենք իրենց դժգոհությունը ներկայացրել են մարզպետարան: Արմավիրի մարզպետարանի քաղաքաշինության վարչության պետից հետաքրքրվեցինք՝ որպես պայմանագրի կողմ պարտավոր էին վերահսկողություն իրականացրել, արդյոք թերացել են, որ տնօրենը դժգոհում է: Ի պատասխան՝ Կարինե Դանիելյանը պնդեց՝ իրենք պատշաճ կերպով հետևել են շինարարության ընթացքին:

Արմավիրի մարզպետարանի աշխատակցի խոսքով՝  վերանորոգվող մասնաշենքը շահագործելու համար անհրաժեշտ է լրացուցիչ 16 միլիոն դրամ: Կարինե Դանիելյանը, սակայն, չգիտի՝  երբ կառավարությունը կորոշի միջոցներ տրամադրել, որպեսզի կապալառու ընկերությունը շարունակի շինարարությունը:

Ուշագրավ է, որ վարչապետ Կարեն Կարապետյանը ևս ուսումնական տարվան ընդառաջ անդրադարձել էր վերանորոգվող դպրոցներին և հանձնարարել   բոլոր դպրոցներում ընթացող շինարարական եւ վերանորոգման աշխատանքները մինչ ուսումնական տարվա մեկնարկը ավարտել, որպեսզի աշակերտները պատշաճ պամաններում դասերն անցկացնեն:

Թեև ինչպես պնդում են Կառավարությունից, վարչապետի հանձնարարականը Թաիրովի միջնակարգ դպրոցին չի վերաբերել, այդուհանդերձ փաստն այն է, որ դպրոցի աշակերտների՝ պատշաճ պայմաններում դասապրոցեսի անցկացումը խաթարված է: Եվ մինչ ըստ նախատեսվածի՝ լինի հաջորդ փուլի ֆինանսական  հատկացումը,  ստացվում է՝ այս դպրոցի երեխաները զրկված են լինելու նորմալ դասեր անցկացնելու հնարավորությունից:

Արդյոք Կառավարությունը չի կարող լրացուցիչ  16 մլն դրամը հատկացնել, որպեսզի սկսած շինարարությունը այդ մեկ մասնաշենքում ավարտեն: Մինչ աշակերտները դպրոցի միջանցքներում դասեր են անում, Կառավարության այսօրվա նիստում պետբյուջեի պահուստային ֆոնդից  39 միլիոն  դրամ հատկացվեց «Թվային Հայաստան» հիմնադրամին, որի հոգաբարձուների խորհրդի նախագահն անձամբ Կարեն Կարապետյանն է:

Շողիկ Գալստյան