24.11.2024 | 10:17
Հրդեհ ավտոտնակում․ այրվել է երկու ավտոմեքենա
Կարեն Կարապետյանը հանձնարարեց Երևանում խցանումները նվազեցնել
Տնտեսություն
19.10.2017 | 11:50
ՀՀ կառավարության այսօրվա նիստում վարչապետ Կարեն Կարապետյանը հանդես եկավ համապատասխան հանձնարարականներով, որոնցից մեկը վերաբերում էր ճանապարհային երթևեկության ընթացքում առաջացած խցանումներին:
Կարապետյանը հիշեցրեց՝ վերջին ժամանակաշրջանում նախաձեռնվել են օրենսդրական և գործնական բարեփոխումներ ճանապարհային կանոնների պահպանման և նվազ նշանակության իրավախախտումների նախազգուշացման կիրառման ուղղությամբ: Վարչապետն ընդգծեց, որ ճանապարհային խախտման դեպքերով տուգանքները վերացվել են: Բացի այդ, մշակված նոր «Վարչական իրավախախտումների վերաբերյալ» օրենսգրքի նախագծով նախատեսվել են նախազգուշացման ինստիտուտի կիրառման ճկուն մեխանիզմներ:
Ըստ Կարապետյանի ՝ փաստ է, որ աշխատանքային օրերին Երևան քաղաքում առկա են խցանումներ, երթևեկության կազմակերպման խնդիրներ, որոնց պատճառները բազմազան են և պահանջում են լուծումներ:
«Մասնավորապես՝ խնդիրներ են առաջանում ուղևորների նստելու կամ իջնելու դեպքերում օրենսգրքով սահմանված մեկ րոպե ժամանակահատվածի պահպանման մասով: Ուստի հանձնարարում եմ ՀՀ տրանսպորտի, կապի և ՏՏ նախարարին, Քաղաքաշինության կոմիտեի նախագահին, ոստիկանության պետին և առաջարկում եմ Երևանի քաղաքապետին երկուամսյա ժամկետում ուսումնասիրել Երևան քաղաքում խցանումների նվազեցման հնարավորությունները՝ հաշվի առնելով որոշ հատվածներում ավտոկայանատեղերի սահմանափակման , ճանապարհային երթևեկության կազմակերպման և հսկողության խստացման ժամանակակից տեխնոլոգիաների ներդրման, ինչպես նաև այլընտրանքային ճանապահների կառուցման հարցերը և կառավարության աշխատակազմ ներկայցնել առաջարկություններ», – նշեց գործադիրի ղեկավարը:
Կարեն Կարապետյանը տրանսպորտի, կապի և ՏՏ նախարարին և ոստիկանության պետին հանձնարարեց մեկամսյա ժամկետում ուսումնասիրել ուղևորների նստելու կամ իջնելու նպատակով կանգառ կատարելու դեպքերում սահմանված ժամանակահատվածի գերազանցումների արձանագրման մոտեցումների վերանայման հնարավորությունը և կառավարության աշխատակազմ ներկայացնել առաջարկություններ:
