12.02.2026 | 12:00
Դատարանը մերժել է եկեղեցու փաստաբանական թիմի միջնորդությունը // Եղանակը կտաքանա․ ԼՈՒՐԵՐ
«Ներքին զգացում ունեմ, որ ՀՔԾ աշխատակիցներն այս պահին քաղաքապետարանում են»․ Դավիթ Խաժակյան
Քաղաքականություն
26.12.2019 | 17:49
Այսօր զանգ ստացա ՀՔԾ-ից, հրավիրվեցի՝ վաղը ներկայացնելու բացատրություն, պաշտոնեական կեղծիքի և պաշտոնեական լիազորությունների չարաշահման գործի վերաբերյալ։ Այս մասին ասաց Երևանի ավագանու «Լույս» խմբակցության ղեկավար Դավիթ Խաժակյանը ֆեյսբուքյան ուղիղ հեռարձակման ընթացքում։
«Հիշում եք, որ պաշտոնական լիազորություններն անցնելու վերաբերյալ այն կարգադրության մեջ, որը քաղաքապետն արձակել էր, լիազորությունները սկզբում դրվել էին Հրաչյա Սարգսյանի վրա, այնուհետև՝ Հայկ Սարգսյանի, որն իրավունք չուներ դրանք իրականացնելու։ Փաստացի, կարգադրության մեջ գրվեց, որ Հրաչյա Սարգսյանը պետք է լիազորությունները վերապահի Հայկ Սարգսյանին՝ քաղաքապետի հանձնարարությամբ։ Ես դիմել էի, որ այդ վերապահման փաստաթուղթը տրամադրեն ինձ, դա ինձ չտրամադրվեց, այլ տրամադրվեց միայն բուն կարգադրությունը։ Չկա այդպիսի թուղթ, որով Հրաչյա Սարգսյանը լիազորություն է դրել Հայկ Սարգսյանի վրա, այսինքն՝ այն որոշումները, որոնք ստորագրել է Հայկ Սարգսյանը, իրականում չեն եղել Հրաչյա Սարգսյանի՝ որպես քաղաքապետի ժամանակավոր պաշտոնակատարի որոշմամբ, որովհետև Հրաչյա Սարգսյանը, ըստ էության, նման որոշում չի թողել»,- ասաց Դավիթ Խաժակյանը։
Ըստ նար՝ ՀՔԾ ներկայացուցիչներն այժմ Երևանի քաղաքապետարանի շենքում են։ «Որոշակի քննարկում է իրականացվում, թե ինչպես է հնարավոր կարգավորել այս հարցը։ Կամ այսօր այստեղ պետք է Հրաչյա Սարգսյանը ստեղծի այդ փաստաթութը հետին թվով և վերապահի Հայկ Սարգսյանին, կամ պետք է քաղաքապետի կարգադրությունը փոխվի, որն, ի դեպ, հրապարակված է և ինձ էլ պաշտոնապես տրված, փոխվի կամ լրացում տրվի, թե քաղաքապետն ինքն է այդ լիազորությունները վերապահում։ Այսինքն՝ կամ պետք է փաստաթուղթ ստեղծվի կամ փոփոխվի։ Երկու դեպքում էլ, գործ հարուցելու պարագայում, ես կդիմեմ ՀՔԾ-ին, որպեսզի այդ փաստաթղթերը փորձաքննվեն։ Եթե վերև բարձրանամ, գուցե տեսնեմ ՀՔԾ ներկայացուցիչներին»,- ընդգծեց Խաժակյանը։
Նրա խոսքով՝ քաղաքապետի լիազորությունները ժամանակավորապես Հայկ Սարգսյանին վերագրվելը հետևանքներ է ունեցել․ «Հայկ Սարգսյանը ստորագրել է 70 և ավելի իրավական ակտեր՝ քաղաքապետի որոշում և կարգադրություններ, որոնք անօրինական են և կարող են հեշտորեն չեղարկվել։ Սա հասցված վնասի մի մասն է, որը շտկելու տարբերակներ են փնտրում։ Տարբերակներից մեկն այն է, որ քաղաքապետը, վերադառնալուն պես, վավերացրել է Հայկ Սարգսյանի կողմից ստորագրված որոշումները և կարգադրությունները։ Իսկ դա կնշանակի՝ ընդունում են, որ Հայկ Սարգսյանն այդ լիազորությունները չուներ»։
Նելլի Մելքոնյան
