30.05.2026 | 10:50
ՌԴ-ն թույլատրել է հայկական երկու ձկնաբուծական ընկերության արտադրանքի ներմուծումը․ ՍԱՏՄ
2019-ին բանակցությունների ֆորմատն անփոփոխ է մնացել և դա մեր դիվանագիտական հաղթանակն է․ Ալիև
24.12.2019 | 16:20
2019 թվականին ղարաբաղյան հակամարտության կարգավորման հարցով բանակցություններում լուրջ առաջընթաց չի արձանագրվել։ Այս մասին, ինչպես տեղեկացնում է Interfax.az-ը, տարին ամփոփելու ժամանակ ասել է Ադրբեջանի նախագահ Իլհամ Ալիևը։
«Կարծում եմ, որ այն կապված է մի քանի պատճառների հետ։ Դա և՛ Հայաստանի իշխանությունների ոչ կառուցողական դիրքորոշումն է, և՛ միջազգային կազմակերպությունների կողմից Հայաստանի վրա բավարար ճնշման բացակայությունն է»,- լրատվամիջոցների հետ զրույցում ասել է Ադրբեջանի ղեկավարը:
Նրա կարծիքով՝ բանակցությունների վրա բացասաբար է ազդել նաև Հայաստանի իշխանությունների «հակասական և անպատեհ» հայտարարությունները։
«Հայաստանի իշխանությունները հայտարարում են, որ Ադրբեջանը պետք է բանակցություններ վարի Լեռնային Ղարաբաղի հետ։ Սա աբսուրդ է։ Այսօր Լեռնային Ղարաբաղում զինծառայողների 90 տոկոսը Հայաստանի քաղաքացիներ են, այս պատճառով բանակցություններն ընթանում են Ադրբեջանի և Հայաստանի միջև։ 2019 թվականին բանակցությունների ֆորմատն անփոփոխ է մնացել՝ չնայած Հայաստանի կողմից այն փոխելու բոլոր փորձերին։ Համարում եմ դա մեր դիվանագիտական հաղթանակը»,- նշել է Ադրբեջանի նախագահը։
Ալիևի կարծիքով՝ Հայաստանը, փորձելով փոխել բանակցությունների ձևաչափը, «փորձում է ձգձգել դրանք կամ պատասխանատվությունը դնել ուրիշների վրա»։ Ադրբեջանի նախագահը նաև հավելել է, որ «Լեռնային Ղարաբաղն Ադրբեջանի անբաժանելի մաս է, և Ադրբեջանի դիրքորոշումը բանակցություններում չի փոխվում և չի կարող փոխվել»։
