Անծանոթը վառվող փայտ է գցել տնակի մեջ․ նոր մանրամասներ` անտառապահի հենակետի հրկիզումից

Դիլիջանի և հարակից գյուղերի բնակիչները բացահայտ պատերազմ են սկսել Բնապահպանության նախարարության դեմ և այդ պայքարում դիմում են ծայրահեղ միջոցների։ Հոկտեմբերի 14-ին Շամախյան տեղամասում անտառապահի տնակի հրկիզումը այդ պայքարի մի դրվագն էր։ Անտառապահի տնակը պատկանում էր «Պանտերա սեքյուրիտի» պահնորդական ընկերությանը, որին Բնապահպանության նախարարությունը վերջերս ներգրավել էր անտառի հսկողության աշխատանքներում։

«Պանտերան» երեք տնակ է տեղադրել Դիլիջանի անտառում։ Շամախյանի տեղամասի տնակը տեղադրել էին հոկտեմբերի 2-ին` հրդեհից 12 օր առաջ։ Հոկտեմբերի 14-ին «Դիլիջան ազգային պարկ» ՊՈԱԿ-ի գրասենյակ էր այցելել բնապահպանության նախարար Արծվիկ Մինասյանը։ Նա խորհրդակցություն էր անցկացրել, անդրադարձել տեսչական ստուգումներին, դատախազություն ուղարկված նյութերին, վերջերս կատարված կադրային փոփոխություններին, որոնց նպատակը հսկողության խստացումն էր: Նախարարը հորդորել էր, որ բնակիչները բավարարվեն անտառի թափուկով և ծառ չկտրեն։ Այդ նույն օրը, ինչպես հաղորդել է «Պանտերա» ընկերության Տավուշի տեղամասի տնօրեն Ռուբեն Խանումյանը, մի խումբ քաղաքացիներ եկել են անտառային տեղամասը հսկող ընկերության աշխատակցի մոտ և վեճի բռնվել նրա հետ։

Երեկ միջադեպի վերաբերյալ նոր մանրամասներ ի հայտ եկան։ Տեղաբնակ մեր աղբյուրը հաղորդում է, որ միջադեպի մասնակիցները 5-6 հոգի են եղել։ Ակտիվ գործողություններ իրականացնողը, սակայն, մեկ հոգի է եղել։ Նա մոտեցել է տնակին և վառվող փայտը ներս է գցել։ Մյուսները պատմել են իրավապահներին, որ չեն ճանաչել տնակը վառողին։ Նա դիմել է փախուստի:

«Չի բացառվում, որ «Դիլիջան ազգային պարկ» ՊՈԱԿ-ի ստորին օղակի աշխատակիցները ևս դեմ են նախարարի նորամուծություններին ու օգնել են հանցագործներին», – հաղորդեց մեր աղբյուրը։

Տեղեկությունները փորձեցինք ճշտել Քննչական կոմիտեից։ «Դեպքի վայրում ներկա անձանցից 4-ի ինքնությունը պարզվել է։ Նրանք ներկայացվել են ճանաչման»,- ընդամենն այսքանը մեզ փոխանցեց կոմիտեի նախագահի խորհրդական Սոնա Տռուզյանը։ Իսկ թե քանի մարդ է մասնակցել վիճաբանությանը եւ ովքեր են նրանք եղել` առայժմ չի հաղորդվում:

Սյուզան Սիմոնյան