17.11.2024 | 21:43
ԵՄ ինտեգրումը Վրաստանի արտաքին քաղաքականության գլխավոր առաջնահերթությունն է
Մեկնարկել է ԱՀ Ազգային ժողովի և ՀՀ Ազգային ժողովի միջև համագործակցության հանձնաժողովի նիստը
Քաղաքականություն
17.12.2019 | 11:10
Քիչ առաջ Ստեփանակերտում մեկնարկել է Արցախի Հանրապետության Ազգային ժողովի և Հայաստանի Հանրապետության Ազգային ժողովի միջև համագործակցության հանձնաժողովի նիստը:
«Արցախպրես»-ի թղթակցի հաղորդմամբ՝ նիստին բացման խոսքով հանդես է եկել ԱՀ Ազգային ժողովի նախագահ Աշոտ Ղուլյանը: Խորհրդարանի ղեկավարը նշել է, որ հանձնաժողովը ամենակայացած ինստտիտուցիոնալ կառույցն է ԱՀ Ազգային ժողովի արտաքին հարաբերությունների ոլորտում: Ա. Ղուլյանի խոսքով՝ ընթացիկ տարում սերտորեն շարունակվել է համագործակցությունը ՀՀ Խորհրդարանի հետ, այդ թվում կազմակերպվել են մի շարք նիստեր, անցկացվել տարբեր ձևաչափով հանդիպումներ:
Այնուհետև ողջույնի խոսքով հանդես է եկել ՀՀ Ազգային ժողովի նախագահ Արարատ Միրզոյանը: Նա նշել է, որ իրենց համար ցանկացած առիթ միայն պատրվակ է կրկին Արցախ այցելելու և գործընկերների հետ ամենատարբեր հարցեր քննարկելու: Ա. Միրզոյանի խոսքով՝ ՀՀ Ազգային ժողովը ջանք չի խնայում զանազան միջխորհրդարանական հարթակներում անդրրադառնալու արցախյան հիմնահարցին:
Անդրադառնալով 2020 թվականին Արցախում կայանալիք համապետական ընտրություններին՝ ՀՀ Ազգային ժողովի նախագահը նշել է, որ Արցախում ազատ և մրցակցային ընտրությունների անցկացումն այլընտրանք չունի:
Նիստի ընթացքում խորհրդարանականները նախ կքննարկեն «Ադրբեջանա-ղարաբաղյան կոնֆլիկտի շուրջ խոսույթը տարբեր հարթակներում» թեման: Այն կներկայացնի ՀՀ Գիտությունների ազգային ակադեմիայի թղթակից անդամ, «Քաղաքական հետազոտությունների ակադեմիա» հասարակական կազմակերպության ղեկավար Ալեքսանդր Մանասյանը:
Հաջորդիվ խորհրդարականների կքննարկմանը կներկայացվի «Բարձրագույն կրթության և գիտության մասին» ՀՀ օրենքի նախագծի ընդհանուր ռազմավարության և աշխատանքային տարբերակի դրույթները: Զեկույցը կներկայացնի ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահի տեղակալ Հովհաննես Հովհաննիսյանը: Յուրաքանչյուր թեմայի ներկայացումին կհաջորդի մտքերի փոխանակությունը:
Ժամը 13:30-ին տեղի կունենա ԱՀ Ազգային ժողովի նախագահ Աշոտ Ղուլյանի և ՀՀ Ազգային ժողովի նախագահ Արարատ Միրզոյանի ճեպազրույցը:
