Ղրղզստանի նախկին նախագահին մեղադրում են սպանության համար

Ղրղզստանի նախկին նախագահ Ալմազբեկ Աթամբաևին նոր մեղադրանք է առաջադրվել՝ սպանության համար։ Նա մեղադրվում է պետական կոմիտեի «Ալֆա» հատուկ նշանակության ենթաբաժնի հրամանատարի տեղակալ, գնդապետ Ուսենբեկ Նիյազբեկովին հրազենով սպանելու համար:

Ղրղզստանի ներքին գործերի նախարար Կաշկար Ջունուշալիևը հայտարարել է, որ դատաձգաբանական ստուգման արդյունքներով՝ գնդապետին սպանել են դիպուկահարի հրացանից, որը գրանցված է Աթամբաևի անունով: Ընդհարումը, որի ընթացքում, ըստ Ղրղզստանի իրավապահների, սպանությունը կատարվել է, տեղի է ունեցել այս տարվա օգոստոսի 7-ին՝ Քոյ-Թաշ գյուղում, որտեղ գտնվում է Աթամբաևի առանձնատունը:

Ղրղզստանի անվտանգության ուժերը պաշարել էին Աթամբաևի առանձնատունը՝ պաշտոնավարման օրոք բռնություններ գործադրելու, զանգվածային անկարգություններ կազմակերպելու և սպանություններ ծրագրելու համար նրան ձերբակալելու նպատակով։

Հիշեցնենք, որ օգոստոսի 7-ին մայրաքաղաք Բիշքեկից ոչ հեռու՝ Քոյ-Թաշ գյուղում գտնվող Աթամբաևի տան գրոհի ժամանակ հրաձգություն էր տեղի ունեցել։ Ղրղզստանի նախկին նախագահն ավելի ուշ խոստովանել էր, որ ինքը ևս հրաձգության մասնակից է եղել։ Հատուկ նշանակության ջոկայիններին չէր հաջողվել Աթամբաևին միանգամից ձերբակալել. նախկին նախագահը միայն հաջորդ օրն էր հանձնվել։ Երկու օր տևած հրաձգության արդյունքում հատուկ նշանակության մեկ ջոկատային էր զոհվել, 136 մարդ՝ տուժել:

Նշենք, որ 2011-2017 թվականներին Ղրղզստանը ղեկավարած Աթամբաևի դեմ պաշտոնավարման ժամկետի ավարտից հետո մի քանի քրեական գործ է հարուցվել, որոնք վերաբերում են ղրղզական Քոյ-Թաշ գյուղում տարածքների ապօրինի ձեռքբերմանը, քրեական հեղինակություն Ազիզ Բատուկաևին ազատ արձակելուն և կաշառակերությանը։

Նշենք, որ հունիսի 27-ին Ղրղզստանի խորհրդարանն Ատամբաևին զրկել է նախկին նախագահի անձեռնմխելիությունից, ինչը մեծացրել է նրան քրեական պատասխանատվության ենթարկելու հավանականությունը։

Նելլի Մելքոնյան