Քաղաքականություն
11.12.2019 | 14:58Արցախի հարցով բանակցային գործընթաց չկա և, ընդհանուր առմամբ, չի էլ եղել վերջին 10-15 տարիներին: Այսօր Երևանում լրագրողների հետ հանդիպմանն ասաց Արցախի նախկին վարչապետ, «Ազատ հայրենիք» կուսակցության նախագահ Արայիկ Հարությունյանը՝ անդրադառնալով հիմնախնդրի կարգավորման շուրջ բանակցային գործընթացին:
«Հանդիպումներ եղել են, բայց դրանք չեն կարող կոչվել բանակցություններ, եթե չկա գլխավոր կողմը՝ Արցախը: Ես բազմաթիվ անգամներ նշել եմ, որ չի կարող լինել բանակցություն՝ առանց Արցախի: Իսկ Հայաստանի և Ադրբեջանի իշխանություններն ընդամենը հանդիպումներ էին ունենում և քննարկում էին ինչ-որ փաստաթղթեր, որի ընդհանուր տրամաբանությունն անընդունելի էր Արցախի ժողովրդի համար»,- ասաց Հարությունյանը:
Նա հավելեց, որ այսօր նույնպես որևէ բանակցություն չի ընթանում. «Ընդամենը կոշտացել, խստացել է մեր դիրքորոշումը, որը ներկայացնում է Հայաստանի իշխանությունը: Եվ այն միտքը, որ Արցախի ինքնորոշման իրավունքը, անկախությունը սակարկման թեմա չեն, չի կարող քննարկվել, չի կարող լինել բանակցության թեմա: Սա նախապայման է մեզ համար: Իսկ հետագան կախված է լինելու՝ մեր այդ նախապայմանն ինչպես է ընդունվելու Ադրբեջանի և, ընդհանուր առմամբ, բանակցողների կողմից»:
Արայիկ Հարությունյանը հայտարարեց, որ չի կարող քննարկման թեմա դառնալ մի բանաձև, որն անընդունելի է առաջին հերթին Արցախի ժողովրդի համար:
«Շատ ժամանակ մեզ ասում են՝ ինչո՞ւ այն ժամանակ քայլեր չեք ձեռնարկել: Գիտեք՝ մենք ունենք նախադեպ, երբ որ այն իշխանությունը Հայաստանում, ի դեպ՝ նաև Արցախում, որը շեղվի այդ կուրսից, երկար կյանք չի ունենալու»,- ասաց Հարությունյանը՝ կրկին հայտարարելով, որ այն իշխանությունը, որոնք Արցախի համար անընդունելի տարբերակ, բանաձև քննարկի, «կա՛մ պետք է հրաժարվի բանակցություններից, կա՛մ արժանանալու է նույն ճակատագրին՝ ստիպված է լինելու հրաժարվել իշխանությունից»:
Մանրամասները՝ տեսանյութում:
