31.03.2026 | 22:43
Հայաստանի մի շարք հասցեներում էլեկտրաէներգիայի անջատումներ կլինեն
Սերժ Սարգսյանը չպետք է գնա ժնև, քանի դեռ Վիեննայի ու Սանկտ Պետերբուրգի պայմանավորվածությունները Ադրբեջանը չի կատարել. քաղաքագետ
Քաղաքականություն
13.10.2017 | 16:53
Քաղաքագետ Լևոն Շիրինյանը Factor.am-ի հետ զրույցում հնարավոր է համարում, որ Հայաստանը դե ֆակտո հրաժարվել է Վիեննայի և Սանկտ Պետերբուրգի պայմանավորվածություններից, եթե Հայաստանի նախագահը բանակցությունների է գնում առանց Ադրբեջանի կողմից այդ պայմանավորվածությունների ուղղությամբ քայլեր կատարելու:
«Նախապայմանները Ադրբեջանը պիտի կատարի: Եթե մենք ուզում ենք, որ մեր սահմաններին խաղաղություն լինի, Հայաստանը պետք է մեկընդմիշտ դադարեցնի Մինսկի խմբի բանակցություններին մասնակցությունը, քանի դեռ այդ նախապայմանները չեն կատարվել»,- տեսակետ հայտնեց Լևոն Շիրինյանը՝ հավելելով. «Լավ չեն աշխատել հավանաբար ու չի էլ ստացվում, որպեսզի պնդեն: Հերթական անգամ արվում է մի քայլ, որը մեզ ձեռնտու չի: Մյուս կողմից փաստ է, որ վերոնշյալ պայմանավորվածությունները Ադրբեջանի համար ոչ ձեռնտու են, ձեռնտու չեն նաև նրա հովանավոր երկրների համար»:
Նշենք, որ ԵԱՀԿ Մինսկի խմբի նախաձեռնությամբ հոկտեմբերի 16-ին Ժնևում կայանալու է Հայաստանի և Ադրբեջանի նախագահների հանդիպումը: Լևոն Շիրինյանը, սակայն այս հանդիպումից որևէ ակնկալիք չունի:
Ըստ նրա՝ ՙՀայաստանը պետք է դուրս գա բանակցություններից, որովհետև ինքն Ադրբեջանի հետ կոնֆլիկտ չունի: Կոնֆլիկտը Ադրբեջանի և Արցախի միջև է: Հետևապես բանակցությունները պետք է բացառապես իրականացվեն Արցախի և Ադրբեջանի իշխանությունների կողմից: Իսկ եթե Ադրբեջանը հրաժարվի բանակցել Արցախի հետ, Շիրինյանի խոսքով՝ իրենց խնդիրն է:
«Հայկական կողմից մի մտահոգություն կա, որը ոչ մի հիմք չունի. այն է՝ եթե չբանակցենք, պատերազմ կլինի: Չեն կարող: Եթե բանակցենք էլ, իրենք հենց հնարավորություն տեսան պատերազմ սկսելու, բանակցություններին չեն նայի, կսկսեն: Այնպես, ինչպես որ ապրիլյան պատերազմի ժամանակ մենք տեսանք: Դրանք օդի միջի թեզիսներ են, որոնք պատշպանվում են հայկական կողմից»,- նկատեց քաղաքագետը:
Մանրամասները դիտեք քաղաքագետ Լևոն Շիրինյանի հետ Factor.am-ի հարցազրույցում:
Մարինե Խառատյան
