Քաղաքականություն
06.12.2019 | 19:41Ազգային ժողովում պատգամավոր Արման Բաբաջանյանը հետաքրքրվեց օլիգարխների կողմից ՀՀ ներմուծված գաղտնալսող սարքերից։
«Որոշ օլիգարխներ և մասնավոր անձինք կարողացել են ներկրել գաղտնալսման սարքավորումներ, այդ սարքավորումների ճակատագիրն ի՞նչ է եղել, պետությունն արդյոք կարողացել է հեղափոխությունից հետո ինչ-որ միջոցառումներ իրականացնել և այդ մարդկանց զրկել գաղտնալսող այդ սարքերից ու հնարավորությունից։ Մենք գիտենք, որ նաև Արդարադատության քրեակատարողական ծառայությունը, ՊՆ ռազմական ոստիկանությունը, ՊԵԿ օպերատիվ ծառայությունն իրականացնում են օպերատիվ աշխատանքներ, և մենք հիմա գաղտնալսման գործառույթ, փաստորեն, վերապահում ենք միայն Ոստիկանությանը։ Արդյոք կարո՞ղ է վաղը, մյուս օրը մյուս գերատեսչությունները գան և նման գործառույթ ցանկանան իրականացնել»,- հարցրեց Բաբաջանյանը։
«Իմ քայլը» խմբակցության պատգամավորներ Արմեն Խաչատրյանը նկատեց, որ գաղտնալսում միայն կարող են իրականացնել Ոստիկանությունը, ԱԱԾ-ն և Քրեակատարողական հիմնարկները ՔԿՀ-ում և դատապարտյալների նկատմամբ, այլ մարմին այդ իրավասությունը չունի։
«Ինչ վերաբերում է օլիգարխների՝ նման սարքերի ձեռքբերմանը, ես էլ եմ տիրապետում օդից կախված նման լուրերի, սա ազգային անվտանգությանն ուղիղ սպառնացող վտանգ է և ամեն ինչ պետք է ձեռնարկել բացահայտելու համար, եթե կան նման դեպքեր»,- նկատեց Արմեն Խաչատրյանը։
Հիշեցնենք, որ Ազգային ժողովը քննարկում է Օպերատիվ հետախուզական գործունեության մասին ՀՀ օրենքում փոփոխություններ կատարելու մասին օրենքի նախագիծը։
Մանրամասները՝ տեսանյութում։
