Արգիշտի Քարամյանն առաջարկել է դիմում գրել խորհրդականին, որի ղեկավարած խմբի բացահայտման արդյունքում կալանավորվել է ՃՈ պետի տեղակալը

ՊՎԾ պետի պաշտոնակատար Արգիշտի Քարամյանը ՊՎԾ պետի խորհրդական Աշոտ Վանյանին առաջարկել է աշխատանքից ազատվելու դիմում գրել: Տեղեկությունը Factor.am-ի հետ զրույցում հաստատեց Աշոտ Վանյանը: «Ասաց, որ տնտեսագետ է ուզում բերել, ես մասնագիտությամբ իրավաբան եմ, զինվորական, զբաղվում էի ուժային կառույցներով: Երևի չհասկացանք իրար:

Արգիշտի Քարամյանն առաջարկեց, որ դիմում գրեմ, ասաց՝ ինձ տնտեսագետներ են պետք, լավ կլինի, որ գրեք, գնաք: Այսօր գնալու եմ դիմում գրեմ»,- փոխանցեց նա:

Աշոտ Վանյանը կառույցում աշխատանքի է անցել հեղափոխությունից հետո՝ Դավիթ Սանասարյանի հրավերով։

«Հեղափոխությունից հետո Դավիթ Սանասարյանը խնդրեց, որ գամ ուժային կառույցների, զինվորների և սպաների հարցերով զբաղվեմ»,- նշեց նա:

Միաժամանակ Աշոտ Վանյանն ասաց, որ ՊՎԾ պետի պաշտոնակատար Արգիշտի Քարամյանի հետ աշխատանքային կառուցողական հարաբերություններ են ունեցել: Ճշտող հարցին՝ բացառու՞մ է, որ իրեն աշխատանքից հեռացնում են, քանի որ համարվում է, այսպես ասած, Դավիթ Սանասարյանի կադր, Աշոտ Վանյանը պատասխանեց. «Ամեն ինչ էլ կարող է լինի»:

Աշոտ Վանյանը Factor.am-ին նաև ասաց, որ ինքը եղել է այն խմբի ղեկավարը, որի ուսումնասիրությունների արդյունքում բացահայտվել է ոստիկանության համակարգում կոռուպցիոն դեպք և կալանավորվել է ՃՈ պետի տեղակալ Արթուր Տոնոյանը։

ՊՎԾ պետի մամուլի խոսնակ Սեդա Աղբալյանին խնդրեցինք մեկնաբանել, թե ինչու է Արգիշտի Քարամյանն Աշոտ Վանյանին աշխատանքից ազատվելու դիմում գրելու ցուցում տվել:

«Աշոտ Վանյանը այս պահին ազատված չէ աշխատանքից, եթե նա գա դիմում գրի և ազատվի, կարիքը լինելու դեպքում մենք կմեկնաբանենք, թե ինչու ենք ազատել»,- ասաց նա։

Ճշտող հարցին, որ Աշոտ Վանյանը ասում է, որ իրեն ազատել են, քանի որ Արգիշտի Քարամյանն ասել է՝ իրեն տնտեսագետ խորհրդական է անհրաժեշտ, Սեդա Աղբալյանն ասաց. «Չէ կան ուրիշ հիմքեր, ես տեղյակ չեմ ղեկավարության հետ խոսակցությունից»։

Հիշեցնենք, որ գնդապետ Աշոտ Վանյանը «Մարտի 1-ի» գործով ուշագրավ բացահայտում էր արել:

Նա Factor TV-ին տված հարցազրույցում ասել էր, որ 2008 թվականի մարտի 1-ին՝ ժամը 17։00-ի սահմաններում, Արցախի ՊԲ-ի զորամասերի շուրջ 1000 զինծառայող Արցախից արդեն մուտք էին գործել Հայաստանի Հանրապետության տարածք։

«Մարտական զենքով և մարտական փամփուշտներով զինված պայմանագրային զինծառայողներ էին, նրանց տեղափոխող ավտոմեքենաների թիվը 100-ից 110 էր»- ասել էր նա։ 2008-ի մարտի 1-ին Աշոտ Վանյանը զբաղեցնում էր Գորիսի կայազորի Ռազմական ոստիկանության պետի տեղակալի պաշտոնը: Նրա ենթակայությամբ գործած զինվորական ավտոտեսչությունն ապահովել է զինվորականների ավտոշարասյան անվտանգ երթը դեպի Երևան։

Նարեկ Կիրակոսյան