Խոշորացվող համայնքներում բազմաֆունկցիոնալ համայնքային սպասարկման կենտրոններ կձևավորվեն

ՀՀ Կառավարության այսօրվա նիստում  վարչապետ Կարեն Կարապետյանը հանձնարարեց խոշորացվող համայնքներում բազմաֆունկցիոնալ համայնքային սպասարկման կենտրոններ ձևավորվել:

Կարապետյանի խոսքով՝ համայնքներում բնակչությանը մատուցվող ծառայությունների որակը և արդյունավետությունը բարելավելու նպատակով արդեն իսկ գործարկվել են համալիր սոցիալական կենտրոններ: Հետագայում այս կենտրոնները փոխանցվելու են համայնքներին:

Միաժամանակ, մատուցվող ծառայությունների որակն ու արդյունավետությունը բարելավելու նպատակով աշխատանքներ են տարվում խոշորացվող համայնքներում բազմաֆունկցիոնալ համայնքային սպասարկման կենտրոնների ձևավորման ուղղությամբ:

«Ելնելով վերանշյալից և կարևորելով համայնքային ծաայությունները մեկ պատուհանի սկզբունքով մատուցելը՝ հանձնարարում եմ աշխատանքի և սոցիալական հարցերի և տարածքային կառավարման և զարգացման նախարարաներին և Պետական գույքի կառավարման վարչության պետին տասնօրյա ժամկետում մշակել և կառավարության աշխատակազմ ներկայացնել համալիր սոցիալական ծառայությունների տարածքային կենտրոնների և բազմաֆունկցիոնալ համայնքային սպասարկման կենտրոնների՝ նույն հարթակում կազմակերպելու նպատակով միասնական կենտրոնների ձևավորման վերաբերյալ առաջարկություններ: Մասնավորապես, պետք է հստակ անդրադառնալ Աշխատանքի և սոցիալական հարցերի նախարարությանը հստակ տարածքներ հատկացնելու հարցին»,- ասաց նա:

Բացի այդ, վարչապետը հանձնարարեց աշխատանքի և սոցիալական հարցերի նախարարին միջոցներ ձեռնարկել համալիր սոցիալական ծառայությունների տարածքային կենտրոնների ձևավորման գործընթացի արդյունավետությունը բարձրացնելու ուղղությամբ՝ ամսական պարբերականությամբ կառավարության աշխատակազմ ներկայացնելով այդ մասին տեղեկատվություն:

«Մենք ունեինք ծրագիր, որով ստեղծվել էին սոցիալական ապահովության կենտրոններ բոլոր տարածքներում, որպեսզի մեր բնակչությանը տայինք որակյալ և նոր կարգի ծառայություններ: Եվ նախատեսված էին վարկային ֆինանսական միջոցներ, որպեսզի դրանց համար համապատասխան շինություններ կառուցվեն: Խոշորացման և համայնքային բարեփոխումների ծրագիրը ցույց է տալիս, որ մենք այնտեղ ունենք տարածքներ, որոնք կարող ենք օգտագործել, մեր ֆինանսական միջոցները խնայել և մեկ պատուհան գաղափարով մի հարթակ ստեղծել, որտեղ բնակիչը որակյալ ծառայություններ ստանա»,- պարզաբանեց Կարապետյանը:

Կառավարության ղեկավարն ընդգծեց, որ տնտեսված միջոցներն ուղղվելու են տեխնիկական վերազինմանը՝ ավելի որակյալ ծառայություն մատուցելու համար:

Շողիկ Գալստյան