«Ընդունելի չէ գումարի դիմաց  1 ամիս ծառայելով բանակից ազատվելը»․ «Իմ քայլի» պատգամավորը՝ գործընկերոջ՝ Հայկ Սարգսյանի, նախաձեռնության մասին. ՏԵՍԱՆՅՈՒԹ

 Factor.am-ը զրուցել է ԱԺ «Իմ քայլը» խմբակցության պատգամավոր Նազելի Բաղդասարյանի հետ

-Տիկին Բաղդասարյան «Հայաստան» համահայկական հիմնադրամին նվիրաբերվող գումարներն այս տարի, ըստ նախնական տվյալների, ավելի սակավ են, քան նախորդ տարի։ Մոտ 10 մլն դոլար։ Ձեզ այդ ցուցանիշը մտահոգո՞ւմ է և ինչո՞վ եք բացատրում դա։ 

-Ես կարծում եմ, որ մտահոգվել պետք չէ, բնավ։ Իհարկե, լավ կլիներ, որ ավելի շատ լիներ նվիրաբերվող գումարը։ Դրան խիստ տրամաբանական մեկ բացատրություն կա՝ այս տարի պետական հաստատություններին և պետական հիմնարկներին չեն ստիպել, որ աշխատակիցները իրենց աշխատավարձերից գումարներ փոխանցեն։ Այսինքն՝ տարիներով ձևավորված այն ինստիտուտը, որ Համահայկական հիմնադրամին պետք է փոխանցել այսքան գումար, այս տարի չի եղել։ Նույնիսկ շատ ինստիտուտների համար տարօրինակ է եղել, թե ինչպես և ինչու։ Խիստ տրամաբանական է այդ նկարագիրը։

-Իսկ այն, որ մեծահարուստներն էլ են քիչ գումարներ փոխանցել։ Ոչ միայն հայ, այլ նաև համաշխարհային։

-Անկեղծ ասած, նման վիճակագրության չեմ տիրապետում։ Պետք է հասկանալ, որ հանգանակությունը կամավոր է, և ամեն մարդ իր կամքով է դա անում։ Նման նախաձեռնություններում ինձ համար կարևոր է ներառականությունը, այսինքն՝ մարդը շատ սակավ կամ քիչ գումարով մասնակցի, բայց ավելի ներառական լինի։

-Այսինքն՝ ավելի շատ մարդ լինի։

-Այո, որ ՀՀ յուրաքանչյուր քաղաքացի իմանա, որ ենթակառուցվածքների զագացման գործում ինքն էլ իր ներդրած լուման ունի։

-Տիկին Բաղդասարյան, ենթադրվում էր, որ նվիրատուների վստահությունը ավելի մեծ պետք է լինի նոր Հայաստանի հանդեպ, քանի որ իրենց գումարները, այսպես թե այնպես, չեն մսխվելու։ Այնուամենայնիվ, կարծես նման բան չեղավ։

 -Եթե այդ տեսանկյունից նայենք, եկեք ես հակառակ տեսակետն ասեմ՝ հավանաբար, բոլորը վստահ են, որ ներկայիս կառավարությունը պետական բյուջեի միջոցներով ի զորու է հստակ փոփոխություններ անել և հավելյալ հիմնադրամների հույսին պետք չէ միայն մնալ։ Բայց ես էլի եմ պնդում, որ սա մասնակցային բնույթ կրող երևույթ է, և հենքը կամավորության սկզբունքն է։

-Տիկին Բաղդասարյան, մինչ Նիկոլ Փաշինյանը հայտարարում է՝ կոռուպցիա չկա, ընդդիմությունը, մասնավորապես Երևանի քաղաքապետարանում բարձրաձայնում է ռեկետի մասին, այս ձևակերպումը Դավիթ Խաժակյանինն է։ Քաղաքապետարանին կառուցապատողների կողմից նվիրաբերությունների գործընթացին տեղյա՞կ եք և դա Ձեզ ի՞նչ է ասում։

-Տեղյակ եմ այնքանով, որ «Լուսավոր Հայաստանի» կողմից քաղաքական հայտարարություն է արվել, և Երևանի ավագանին համապատասխան գնահատական կտա։ Բայց քանի որ խնդիրն իմ իրավասություններից դուրս է, չեմ ուզում մեկնաբանել, առավել ևս եթե կոռուպցիայի մասին հայտարարություն է արվում։ Սա հանցագործության մասին հաղորդում է, և իրավապահները պետք է արձագանքեն։ Եթե իհարկե, այդ հրապարակումները հիմնավոր են։

-Բոլոր դեպքերում այն, ինչ բարձրաձայնվում է, պե՞տք է «Իմ քայլ»-ում քննարկման առարկա դառնա։

-Եթե խնդիրը հանրային հետաքրքրության շրջանակներում լինի, այո, կարծում եմ, Ազգային ժողովում քննարկման առարկա կարող է դառնալ։ Բայց մինչ այժմ այդպիսի մտահոգությունների լայն ալիք ես չեմ տեսնում։

-Տիկին Բաղդասարյան, այսօր Գլխավոր դատախազը հայտարարել է, որ քրեական գործերով անցնող ամեն մեկը, իր ձևակերպմամբ, փախչում է իր հնարավորությունների «գյորա», նկատի ունենալով՝ Սուրիկ Խաչատրյանին, Միհրան Պողոսյանին, Գևորգ Կոստանյանին։ Ըստ Ձեզ, այստեղ իրավապահ համակարգը չի՞ թերանում, որ ի սկզբանե մարդկանց թույլ է տվել իրենց «գյորա» փախչել։

-Քանի դեռ մեղադրանք չկա առաջադրված, քանի դեռ այդ անձինք չեն անցնում որպես կասկածյալ, մեղադրյալ, որևէ իրավական միջոց չկա ինչ-որ սանկցիա կիրառել, որ այդ մարդիկ երկրից դուրս չգան, երկիրը չլքեն։ Սա զուտ իրավական առումով։ Այստեղ հարց է ծագում, մենք ուզո՞ւմ ենք ունենալ իրավական երկիր, թե՞ ոչ։ Թե՞ խիստ ռեպրեսիվ մեթոդներով գնանք, ճնշումներ գործադրենք և թույլ չտանք երկրից դուրս գալու։ Բայց, այնուամենայնիվ, կարծում եմ, եթե մարդիկ որևէ գործով ներգրավված են ու անգամ այն հանգամանքը, որ նրանք ՀՀ-ից դուրս են, իրենց թույլ չի տալիս խուսափել պատժից։ Ինչ վերաբերում է դատախազի հայտարարությանը, բնականաբար, պետք է այստեղ այն մարդիկ, որոնք գտնվում են արտերկրում, մասնավորապես պարոն Կոստանյանը, հստակ հասկանան, որ օրինականության գործընթացներին տիրապետում են ու վստահ եմ՝ հասկանում են, թե ինչ հետևանքներ կարող է սա ունենալ։

-Տիկին Բաղդասարյան, հավանաբար, տեղյակ եք, որ Մարտի 1-ի գործով քննչական խմբի նախկին ղեկավար Վահագն Հարությունյանը ցանկություն է հայտնել բուժումը ՌԴ-ում կիսատ թողնել ու վերադառնալ Հայաստան։ Դուք ունե՞ք բացատրություն՝ ի՞նչ է տեղի ունենում, որ նա չի ցանկանում մնալ այնտեղ և ուզում է գալ ու պատասխան տալ դրա համար։

-Գիտենք՝ ցանկացած կարծիք կամ ենթադրություն, որ այս պահին կարող է հնչել առավել ևս քաղաքական գործչի շուրթերից, կարծում եմ, շատ հակասական ազդեցություն կարող է ունենալ Մարտի 1-ի գործով քննության վրա, որովհետև այս գործում, իսկապես, շատ բացեր ու մութ տեղեր կան՝ արդյոք գործով վկաները բավականին պաշտպանվա՞ծ են, արդյոք այն զարգացումները, որոնք տեղի ունեցան նախօրեին փոխկապակցվա՞ծ են Մարտի 1-ի բուն գործի հետ։ Սա առայժմ զուտ կարող է ենթադրությունների դաշտում լինել։ Այս գործի վերաբերյալ այս փուլում ցանկացած ենթադրություն, կարծում եմ, էական վնաս կհասցնի քննությանը։

-Տիկին Բաղդասարյան, ԱԺ-ում քննարկվում էր  քրեական ենթամշակույթ կրող խմբավորում ստեղծելը քրեականացնող օրինագիծը։ Այս առթիվ Ձեր հասցեին հնչեցին սպառնալիքներ, որին անդրադարձավ նաև վարչապետ Նիկոլ Փաշինյանը։ Այդ առիթով գործ հարուցվե՞ց, թե՝ ոչ, Ձեզնից ներողություն խնդրեցի՞ն։

-Շատ տարօրինակ ընթացք ունեցավ, եկեք մեկ հստակեցում անենք՝ ուղիղ սպառնալիք չի հնչել իր կողմից, բայց այն ուղղորդումները, այն հորդորները, որոնք եղել են, եղել են իր անունից։ Գյումրին այդքան էլ մեծ քաղաք չէ, բոլորը բոլորին ճանաչում են․․․

-Այսինքն, իր անունից, նշանակում է քրեական հեղինակությունների սպառնալիքները հնչել են Վարդան Ղուկասյանի բերանո՞վ։

-Այն մարդիկ, որոնք մտերիմ հարաբերությունների մեջ են, ինձ հորդորել են, որպեսզի հետ մնամ այս օրինագիծը ներկայացնելուց։ Հավանաբար սկզբնական փուլում ենթադրել են, որ ես եմ օրինագծի հեղինակը, չնայած հեղինակը չլինելով ամբողջությամբ կիսում եմ այս նախագծի մոտեցումները և հիմքում դրված գաղափարը։ Բայց, կարծում եմ, որ շատ քիչ իրավական գիտելիքներ ունեցող մարդու համար անկախ այն հանգամանքից, թե ով է հիմնական կամ հարակից զեկուցողը, եթե օրենքի անհրաժեշտությունը կա, այն ընդունվելու է։ Ինչ վերաբերում է հետագա զարգացումներին, գիտեք, որ եղավ վարչապետի շատ կոշտ հայտարարությունը, որից հետո պարոն Ղուկասյանը բազմաթիվ անգամներ նշեց, որ ինձ չի ճանաչում, ինչը կներեք այս բառի համար, անողոք սուտ է, որովհետև դրա բազմաթիվ ապացույցները կան։

-Ձեր գործընկեր Հայկ Սարգսյանն ուզում է օրենսդրական նախաձեռնությամբ հանդես գալ, որով արագացված ընթացակարգով զինվորական ծառայություն է առաջարկում նրանց, որոնք կարող են մուծել 10 միլիոն դրամ։ Ձեզ հետ քննարկվե՞լ է այս նախագիծը։

-Խմբակցության նիստում չի քննարկվել այս նախագիծը, բայց գիտեք յուրաքանչյուր պատգամավոր ազատ է իր գործունեության մեջ։ Այս նախագիծը բազմաթիվ խութեր ունի և գոնե այս ձևաչափով ինձ համար ընդունելի չէ։

-Մասնավորապես ի՞նչը ընդունելի չէ։

-Ընդունելի չէ գումարի միջոցով մեկ ամիս ծառայելը։ Որովհետև դա էլ յուրահատուկ տեսակ է հայրենիքին ծառայելու և այս ինստիտուտը այս եղանակով… ստացվում է, որ մենք, եթե նախկինում գումար տալով ազատվում էինք ծառայությունից, հիմա օրինական դաշտ ենք տեղափոխում։ Ինձ համար գոնե սա այս փուլում ընդունելի չէ։

-Հայկ Սարգսյանն ասում է, որ ընտրել է գումարի մի չափ, որը մուծելուց հետո զինակոչիկի մոտ արտագաղթելու ցանկությունը կմարի, քանի որ գումարը կտա և կմնա Հայաստանում։

-Այս պարագայում պարոն Սարգսյանը բարի և ազնիվ նպատակներ է դրել նախագծի մեջ, բայց, այնուամենայնիվ, ինձ համար այս ձևաչափն ընդունելի չէ։ Միգուցե խմբակցությունում քննարկենք և այնքան փաստարկվի, որ ես կարծիքս փոխեմ։

Մհեր Արշակյան

Մանրամասները՝ տեսանյութում: