Որքանո՞վ է բարոյական Սամվել Ալեքսանյանից նվեր ընդունել. մեկնաբանում է Հայկ Մարությանի խոսնակը. ՏԵՍԱՆՅՈՒԹ

Մի քանի օր է քննարկվում է, որ գործարար, ՀՀԿ-ական նախկին պատգամավոր Սամվել Ալեքսանյանը Երևանի քաղաքապետարանին աղբատար մեքենաներ է նվիրել: Նման պնդումներ անում է Երևանի ավագանու «Լույս» խմբակցության անդամ Դավիթ Խաժակյանը՝ մատնանշելով այն փաստը, որ «Ալեքս ընդ հոլդինգ» ՍՊԸ-ն երեք հատ տեխնիկա է նվիրել համայնքին:

Երևանի քաղաքապետարանը հերքում է այս տեղեկությունը: Քաղաքապետի խոսնակ Հակոբ Կարապետյանը հրավիրված ասուլիսի ժամանակ պատասխանելով Factor.am-ի հարցին ասաց, որ իրենք անձամբ Սամվել Ալեքսանյանից նվեր չեն ստացել, քանի որ «Ալեքս ընդ հոլդինգ» ՍՊԸ-ն պետռեգիստրում գրանցված է այլ անունով: Այդ անձն էլ, թե որքանով է փոխկապակցված Սամվել Ալեքսանյանի հետ՝ քաղաքապետարանում տեղեկություն չունեն:

Հակոբ Կարապետյանը միաժամանակ նշեց, որ, եթե անձամբ Սամվել Ալեքսանյանը նվիրատվություն անի՝ կընդունեն:

Factor.am-ը Հայկ Մարությանի խոսնակից հետաքրքրվեց, որ թեև օրենքի առումով խախտում չկա, բայց որքանո՞վ է բարոյական՝ հեղափոխությամբ իշխանության եկած քաղաքական ուժը նվերներ է վերցնում մի գործարարից, որին մի քանի տարի առաջ Նիկոլ Փաշինյանն առաջարկում էր սպանության քրգործում ներգրավել: Հիշեցնենք, որ այն ժամանակ պատգամավոր Փաշինյանը ՀՔԾ-ին առաջարկում էր Սամվել Ալեքսանյանի նախկին աշխատակցի՝ Արմեն Իսրաելյանի, որը հայտնի էր Ձկնկուլ մականունով, սպանության համար գործ հարուցել և ներգրավել Սամվել Ալեքսանյանին:

Ինչպես նաև նախկինում Նիկոլ Փաշինյանը Սամվել Ալեքսանյանին վերագրում էր շաքարավազի շուկայում մենաշնորհային դիրք ունենալը, ընտրությունների ժամանակ ՀՀԿ-ի օգտին «աշխատելը» և այլն:

Երևանի քաղաքապետի խոսնակը պատասխանեց. «Օրենքի տեսակետից խնդիր չկա, շնորհակալություն, որ նշեցիք: Բարոյականության տեսակետից էլ եկեք խնդրենք, թող հանրությունը գնահատի»:

Մանրամասները՝ տեսանյութում:

Նարեկ Կիրակոսյան