Երևանի ավագանու արտահերթ նիստ այսօր ևս անցավ լարվածության և փոխադարձ վիրավորանքների մթնոլորտում: Նիստի օրակարգում ներառված էին «Էրեբունի-Երևան» տոնակատարությանն ընդառաջ «Երևանի պատվավոր քաղաքացու» կոչումներ շնորհելու և բնակարաններ նվիրելու հարցերը: Ավագանու անդամների մեծամասնության հավանությանն արժանացած օրակարգի հարցերի մեծամասնությանը դեմ արտահայտվեցին «Երկիր Ծիրանի» խմբակցության անդամները:
Ավագանու որոշմամբ` բնակարաններ նվեր ստացան ժողովրդական արտիստ Ռուբեն Մաթևոսյանը, վաստակավոր արտիստներ՝ Ռուդոլֆ Ղևոնդյանը և Սևակ Ավետիսյանը: Ժողովրդական արտիստներ Արտավազդ Փելեշյանը, Նարա Շլեպչյանը, բանաստեղծ Ռազմիկ Դավոյանը և «ՎիվաՍել–ՄՏՍ»-ի գլխավոր տնօրեն Ռալֆ Յիրիկյանը արժանացան «Երևանի պատվավոր քաղաքացի» կոչմանը: Այս բոլոր հարցերին դեմ քվեարկեց «Երկիր Ծիրանի»-ին, կողմ՝ ՀՀԿ-ն և «Ելք»-ը: Վերջինս դեմ քվեարկեց միայն Ռազմիկ Դավոյանին «Երևանի պատվավոր քաղաքացի» կոչմում շնորհելու հարցին:
Թեև ընդդիմադիր «Երկիր Ծիրանի» խմբակցության ղեկավար Զարուհի Փոստանջյանը ողջ նիստի ընթացքում լռություն պահպանեց, սակայն խմբակցության մյուս երկու անդամները՝ Մարինա Խաչատրյանը և Սոնա Աղեկյանը, պարբերաբար հարցեր էին հնչեցնում և ներկայացնում առարակություններ՝ օրակարգում ներառված հարցերի շուրջ:
Խմբակցության ընդդիմադիր անդամներին հետաքրքող հիմնական հարցն այն էր, թե ինչ սկզբունքով են ընտրվել «Երևանի պատվավոր քաղաքացու» կոչման արժանացածներն ու բնակարան ստացածները:
Մարինա Խաչատրյանի և Սոնա Աղեկյանի հարցերին բավական սուր էին արձագանքում խմբակցության ՀՀԿ-ական անդամները: Նրանք ոչ միայն իրենց զարմանքն էին արտահայտում «Երկիր Ծիրանիի» անդամների առարկությունների շուրջ, այլև վիրավորանքներ ու սպառնալիքներ հնչեցնում:
Ինչպես միշտ՝ առանձնակի ագրեսիվությամբ աչքի էին ընկնում ՀՀԿ-ական անդամներ Լևոն Իգիթյանը, «Ծիտ» մականունով Արմեն Սահակյանը: Նաև՝ Աստղիկ Գևորգյանը, Կամո Հովհաննիսյանը, Կամո Արեյանը:
«Դուք ինչ եք արել ձեր ամբողջ կյանքում, որ համարձակվում եք Փելեշյանի մասին անգամ հարց տալ, ինձ թվաց՝ ես Ադրբեջանում եմ նստած, էս ի՞նչ գործունեություն է»,- հարցն ուղղելով «Երկիր Ծիրանիի» անդամներին՝ հակադարձեց Լևոն Իգիթյանը: Վերջինս, ի դեպ, ժամանակ առ ժամանակ նաև հայհոյանքներ և սպառնալիքներ էր հնչեցնում: Նրան անգամ ՀՀԿ-ական գործընկերներն էին փորձում սաստել, սակայն ապարդյուն:
Խմբակցության մեկ այլ անդամ Կամո Հովհաննիսյանը սպառնաց դատի տալ «Երկիր Ծիրանի» խմբակցության ընդդիմադիր անդամներին՝ քաղաքապետ Տարոն Մարգարյանին և նախագահ Սերժ Սարգսյանին վիրավորելու համար: Մարինա Խաչատրյանն ու Սոնա Աղեկյանը, սակայն շարունակում էին անվրդով կերպով պնդել, որ մեդալներ ու կոչումներ շնորհողները մեղավոր են երկրում ստեղծված ծայրահեղ իրավիճակի համար:
Նիստի ավարտին Կամո Արեյանն արձանագրեց, որ ընդդիմադիրներին ուղղված իրենց կոչերը արդյունք չեն տալիս:
«Ռեխներդ բացելուց առաջ՝ ձեզ հաշիվ տվեք»,- ահա այսպիսի ձևակերպմամբ՝ ավագանու ընդդիմադիր գործընկերներին հորդորով դիմեց Երևանի փոխքաղաքապետը:
Մանրամասները՝ տեսանյութում:
Շողիկ Գալստյան
