Մարդիկ դատվում են՝ դիմումը մի քանի օր ուշ մուտք անելու համար․ Խաժակյանը կդիմի Դատախազություն. ՏԵՍԱՆՅՈՒԹ

Քաղաքապետի լիազորություններն իրականացվել են մի պաշտոնյայի կողմից, որը չուներ օրենքով նման լիազորություն»: Երևանի ավագանու նիստի ժամանակ այս մասին հայտարարեց «Լույս» խմբակցության ղեկավար Դավիթ Խաժակյանը։

«Այս ամիս Երևանի քաղաքապետը մեկնեց արձակուրդի և ըստ օրենքի՝ քաղաքապետի առաջին տեղակալը փոխարինեց քաղաքապետին իր բացակայության ժամանակ։ Օրենքով այլ դեպք, քան քաղաքապետի առաջին տեղակալի կողմից քաղաքապետի լիազորություններ կատարելը, չի նախատեսվում։ Այդ լիազորությունները քաղաքապետի գիտությամբ իրականացրեց Հայկ Սարգսյանը, ով ավելի քան 70 իրավական ակտ ընդունեց: Այդ գործընթացը սկսվեց ամսի 4-ից, և եթե նայեք ամսի 4-ի՝ քաղաքապետի որոշումների էջում դրված հայտարարությունները, կտեսնեք, որ ունեցել ենք քաղաքապետի երեք դերակատար՝ Հրաչյա Սարգսյանը, Հայկ Սարգսյանը, քաղաքապետը։ Խնդիրը տեխնիկական չէ։ Պետք է պարզաբանվի, թե ինչպես է այդ փոխակերպումը տեղի ունեցել»,- հայտարարեց Խաժակյանը։

Նրան չբավարարեց հնչած պարզաբանումը, թե քաղաքապետի հանձնարարությամբ տեղակալները կարող են իրականացնել նաև այլ լիազորություններ: «Եթե այս փաստարկն իրավական ճշգրտության հետ որևէ առնչություն ունենար, նշանակում է՝ քաղաքապետը կարող է ցանկացած պահի քաղաքապետի որոշում ստորագրելը վերապահել այն անձին, որը հնչեցրել է այդ միտքը։ Սա չի կարող տարածվել քաղաքապետի բացառիկ լիազորությունների վրա»,- ասաց նա։

Խաժակյանը հարց ուղղեց Իրավաբանական վարչության պետին՝ արդյո՞ք նա նշագրել է որոշում, որը վերաբերվում էր քաղաքապետի լիազորությունները տեղակալ Հայկ Սարգսյանին վերապահելու մասով։ Վարչության պետ Թունյանը պատասխանեց, թե վարչությունը կատարել է այդպիսի նշագրում։

«Վերջերս բոլոր պաշտոնյաների մոտ սովորություն է ձևավորվել՝ բոլոր առիթներով համապատասխան գործեր հարուցել, մենք այդ օրինակը վերցնում ենք։ Մարդիկ դատվում են, որովհետև մի քանի օր ուշ են մուտք արել Մալբըրի։ Սա ընդհանուր տենդենց է, որին հետևում ենք»,- ասաց Խաժակյանը։

Մանրամասները՝ տեսանյութում:

Ռոբերտ Անանյան