12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Նիկոլ Փաշինյանից 10 մեջբերում՝ «Կոմերսանտ»-ի նոր շարքում
Քաղաքականություն
25.11.2019 | 18:54
Ռուսական «Կոմերսանտ» պարբերականը նոր շարք է նախաձեռնել՝ նպատակ ունենալով ընթերցողներին հնարավորություն ընձեռել ավելի լավ ճանաչել նախկին խորհրդային երկրների առաջնորդներին: Շարքի երկրորդ թողարկման հերոսը ՀՀ վարչապետ Նիկոլ Փաշինյանն է:
Պարբերականը 10 մեջբերումով ներկայացրել է Նիկոլ Փաշինյանի մտքերը, հայացքները, հիշողություները Հայաստանում հեղափոխության, արցախյան հիմնախնդրի, ՌԴ-ի հետ հարաբերությունների, Հայաստանում հեղափոխությունից առաջ և հետո արվածի մասին: Հրապարակումն ուղեկցվել է Կոնստանտին Կուկսոյի ծաղրանկարով:
Ըստ հրապարակման՝ Փաշինյանը նշել է, որ հայկական «թավշյա հեղափոխությունը» ռոմանտիզմի հաղթանակն էր պրագմատիզմի նկատմամբ, իսկ այն իրականացնելու համար 200 հազար դոլար է ծախսվել:
«Որտեղի՞ց են այդ փողերը: Մենք մարդկանցից ենք խնդրել: Մենք էլեկտրոնային դրամապանակ ունեինք, և ամբողջ աշխարհից հայերը, ընդ որում, մեծ մասը՝ Ռուսաստանից, մեզ գումար էին նվիրում»,- Նիկոլ Փաշինյանին է մեջբերել «Կոմերսանտը»:
Պարբերականը նաև հիշեցրել է 2016 թվականի ապրիլյան պատերազմից հետո Փաշինյանի մտքերը: «Ղարաբաղում քաղաքացիները, որոնց հետ ես զրուցել եմ, այսպիսի մոտեցում ունեին. այս փուլում հարկավոր է ամեն ինչ անել՝ Ադրբեջանին լուրջ վնաս հասցնելու համար, որպեսզի երաշխիք ունենանք, որ Ադրբեջանի իշխանությունները, Իլհամ Ալիևը գոնե մեկ տարի չեն կարողանա դուրս գալ շոկային վիճակից»,- ասել է այն ժամանակ պատգամավոր Փաշինյանը:
«Կոմերսանտը» ներկայացրել է նաև դեռևս ընդդիմադիր պատգամավոր եղած ժամանակ ՌԴ-ի հետ հարաբերությունների մասին Փաշինյանի հնչեցրած հայտարարությունները, նրա արտահայտությունները Արցախում որդու ծառայության, մեքենա և պետություն վարելու, արտաքին տեքսի, փոխզիջումների և այլնի մասին:
