07.11.2026 | 20:28
Նարեկ Կարապետյանի հանդիպումը համախմբման կոչին արձագանքած ուժերի հետ. ՈՒՂԻՂ
ՀՅԴ Հայաստանի Գերագույն մարմինը հյուրընկալել է ԱՄՆ դեսպան Լին Թրեյսիին
Քաղաքականություն
25.11.2019 | 18:46
ՀՅԴ Հայաստանի Գերագույն Մարմինը տեղեկացնում է, որ այսօր՝ նոյեմբերի 25-ին, Հայաստանում ԱՄՆ դեսպան Լին Թրեյսիի նախաձեռնությամբ, ՀՅԴ Հայաստանի Գերագույն մարմնի գրասենյակում տեղի է ունեցել հանդիպում ՀՅԴ Հայաստանի Գերագույն մարմնի անդամների հետ:
«Դեսպան Լին Թրեյսիին ուղեկցում էին ՀՀ-ում ԱՄՆ դեսպանության քաղաքական և տնտեսական բաժնի ղեկավար Ռայան Քեմբելլը, քաղաքական հարցերով մասնագետ Լիլիթ Օհանյանը:
ՀՅԴ Հայաստանի կառույցը ներկայացնում էին ԳՄ ներկայացուցիչ Իշխան Սաղաթելյանը, ԳՄ անդամներ՝ Արծվիկ Մինասյանը, Լիլիթ Գալստյանը և Աշոտ Սիմոնյանը:
Շնորհակալություն հայտնելով դեսպանին հանդիպման նախաձեռնության համար, ինչպես նաև շնորհավորելով նրան Հայաստանում ԱՄՆ դեսպանի պաշտոնը ստանձնելու կապակցությամբ՝ Իշխան Սաղաթելյանն ընդհանուր գծերով ներկայացրեց իշխանափոխությունից հետո Հայաստանում ձևավորված քաղաքական իրողությունները: Նա մասնավորապես հնչեցրեց ՀՅԴ Հայաստանի կառույցի գնահատականներն ու մի շարք մտահոգություններ բարձրաձայնեց երկրում ընթացող քաղաքական գործընթացների առնչությամբ:
Հանդիպմանը մասնակից՝ ՀՅԴ ԳՄ մյուս անդամները շեշտադրեցին հանրապետությունում իրական, բովանդակային և համակարգված բարեփոխումների իրականացման անհրաժեշտությունը, միաժամանակ իրենց անհանգստությունն արտահայտեցին երկրում սահմանադրական և ժողովրդավարական ինստիտուտների նկատմամբ նկատվող անառողջ գործընթացների կապակցությամբ:
Դեսպան Թրեյսին իր խոսքում մասնավորապես նշեց. «Ես արժևորում եմ ԱՄՆ դեսպանատան երկարամյա հարաբերությունները Հայաստանի քաղաքական կուսակցությունների, այդ թվում՝ ՀՅԴ-ի հետ: Միացյալ Նահանգները շարունակում է հավատարիմ մնալ Հայաստանի ժողովրդավարական, տնտեսական ու սոցիալական կառավարմանն աջակցելու՝ իր հանձնառությանը, ինչպես դա եղել է մեր դիվանագիտական հարաբերությունների 27 տարիներին»:
Հանդիպման վերջում կողմերը շփումները պարբերական դարձնելու և մոտեցումները միմյանց փոխանակելու համոզում հայտնեցին»,- ասված է հաղորդագրությունում:
