Պարոն Մարուքյան, հույս ունեմ՝ բացի Բագրատյանից, մեկ-մեկ քաղաքական այլ գործիչների էլ կլսեք․ Ռուբեն Ռուբինյան. ՏԵՍԱՆՅՈՒԹ

Արտաքին հարաբերությունների հանձնաժողովի նիստում այսօր քննարկվում է ՀՀ կառավարության և Չինաստանի Ժողովրդական Հանրապետության կառավարության միջև սովորական անձնագրեր կրող անձանց համար մուտքի արտոնագրի պահանջի փոխադարձաբար վերացման մասին համաձայնագիրը վավերացնելու մասին օրենքի նախագիծը։

Քննարկման ժամանակ «Իմ քայլը» խմբակցության պատգամավոր Ռուբեն Ռուբինյանը նշեց, որ Արևելյան Եվրոպայի երկրները ներգաղթյալների մեծ հոսքի խնդիր ունեն, իսկ Հայաստանն օբյեկտիվորեն առայժմ այդպիսի խնդիր չունի։

«Սա, իհարկե, չի նշանակում, որ մենք պիտի ուղղակի, առանց ինչ-որ զսպող կամ երաշխավորող գործիքների բացվենք ամբողջ աշխարհի առաջ, բայց միևնույն ժամանակ եկեք չխաբենք մեզ՝ աշխարհի բոլոր մարդիկ նստած չեն սպասում մեզ, թե երբ են ներգաղթելու Հայաստան»,- նշեց Ռուբինյանը։

Նրա խոսքին արձագանքեց «Լուսավոր Հայաստան» խմբակցության պատգամավոր Էդմոն Մարուքյանը։

«Պարոն Բագրատյանը նման հայտարարություն է արել, և ձեր իշխանությունը չի պատասխանել, հետևաբար ընդունում է այդ հայտարարությունը, որ ներգաղթի թվերը մանիպուլացնում եք այլ ազգերի՝ Հայաստանի մուտքով։ Ընդհանուր ստատիստիկան ցույց եք տալիս, որ Հայաստան լուրջ ներգաղթ կա։ Լավ կլինի, պարոն Ռուբինյան, որ ձեր իշխանությունը հստակ պատասխանի այդ հայտարարությանը»,- ասաց Մարուքյանը։

Ռուբեն Ռուբինյանն էլ վստահություն հայտնեց, որ Մարուքյանը թվերին չի ծանոթացել։

«Պարոն Մարուքյան, եթե գնանք մանիպուլյատիվ ուղղով, կարող ենք ասել, որ մի 100․000 Հնդկաստանի քաղաքացի՞ է եկել Հայաստան, ու սենց ցույց են տալիս, որ լցնում են»,- ասաց Ռուբինյանը։

Մարուքյանը նկատեց, որ 37․000 հնդկացի կա, իսկ Ռուբինյանը նշեց, որ սխալ թիվ է։

«Պարոն Մարուքյան, հույս ունեմ՝ բացի Բագրատյանից, մեկ-մեկ քաղաքական այլ գործիչների էլ կլսեք»,- դիմելով Էդմոն Մարուքյանին՝ ասաց Ռուբեն Ռուբինյանը։

Մանրամասները՝ տեսանյութում։