«Զավեշտի ժանրից է, երբ ասում են` Սերժ Սարգսյանը Ստեփանակերտից դուրս սեփականություն չունի»․ Գևորգ Սաֆարյան. ՏԵՍԱՆՅՈՒԹ

«Սասնա Ծռեր» կուսակցության քարտուղարության անդամ Գևորգ Սաֆարյանը, որը նախկին իշխանության ժամանակ 2 տարով ազատազրկվել էր Ազատության հրապարակում տոնածառ տեղադրելու շուրջ միջադեպից հետո, Factor.am-ի հետ զրույցում անդրադառնալով ԵԺԿ-ում Սերժ Սարգսյանի ելույթին, թե հեղափոխությունից հետո երկրում ժողովրդավարությանը սպառնացող վտանգավոր զարգացումներ են տեղի ունենում, խաթարվել են սահմանադրականության հիմքերը, ասաց․ «Եթե շարունակվի նախկին հանցագործ իշխանության նկատմամբ այս թավիշը և հանցագործները չհայտնվեն բանտերում, ապա 5-րդ շարասյունը սկսելու է գործել։ Սա 5-րդ շարասյան էլեմենտներից է։ Երկրորդ՝ Սերժ Սարգսյանը փորձում է իր համար անվտանգության ինչ-որ երաշխիքներ ստեղծել, որ ինքը չհայտնվի բանտում»։

Նրա խոսքով՝ սա հարված է գործող իշխանությանը․ «Որովհետև 5-րդ շարասյունը տեսավ, որ իր նկատմամբ արդարադատությունը, ըստ էության, չի գործում։ Մարդիկ, որոնք կատարել են բազմաթիվ հանցագործություններ, հիմա ազատ շրջում են, այդ թվում նաև՝ Սերժ Սարգսյանը կարողանում է լքել երկիրը, գնալ ԵԺԿ, ելույթ ունենալ»։

Նախկին քաղբանտարկյալի համար «շատ հետաքրքիր է», թե ով է խոսում գործող իշխանությունից դատական իշխանության տարանջատման անհրաժեշտության մասին։ «Սերժ Սարգսյանը ճիշտ էր, այո՛, Հայաստանում տեղի չեն ունենում հեղափոխական փոփոխություններ, և որոշ մարդկանց գիտակցության մեջ հեղափոխությունը դա քաղաքացիական անհնազանդության միջոցով իշխանության գալն էր»,- նշեց նա՝ հավելելով, թե այնինչ հեղափոխությունը պիտի սկսվեր դրանից հետո։

«Այսինքն, մենք հիմա պիտի իրականացնենք հեղափոխություն։ Բազմիցս ասել ենք, որ Սերժ Սարգսյանի ստեղծած արդարադատության համակարգը չի կարող դատել Սերժ Սարգսյանին և պիտի իրականացվի անցումային արդարադատություն, որը նախկին իշխանությունների նկատմամբ կհարուցի այն քրգործերը, որոնք պետք է հարուցվեն»,-շեշտեց նա։

Սաֆարյանի կանխատեսմամբ՝ առաջիկայում տեսնելու ենք է՛լ ավելի ակտիվ գործողություններ 5-րդ շարասյան կողմից։ «Որևիցե դեպքում թույլ չենք տալու, որ 5-րդ շարասյունը վերադառնա»,- հավելեց նա՝ անդրադառնալով «Սասնա Ծռերի» անելիքին։

Անդրադառնալով Սերժ Սարգսյանի գրասենյակի տարածած հայտարարությանը, թե նա Արցախից բացի այլ երկրում սեփականություն չունի ու, որ «Սասնա Ծռերի» տարածած տեղեկությունը, թե Միքայել Մինասյանը Սերժ Սարգսյանի համար Իտալիայում ուրիշի անունով տուն է գնել, ասաց․ «Զավեշտի ժանրից է, երբ որևէ մեկը հայտարարում է, թե Սերժ Սարգսյանը չունի սեփականություն, բացի Ստեփանակերտի սեփականությունից։ Ուշագրավ է, որ իրենք ասում են, թե Դատախազությունը իրենց ասածը կապացուցի։ Սա ապացուցում է այն ֆակտորը, որ նախկին իշխանությունը դատաիրավական համակարգի վրա դեռևս ունի մեծ ազդեցություն։ Այսօրվա գլխավոր դատախազը նախկին գլխավոր դատախազն է։ Այսօրվա դատավորները իրենց նշանակած են»։

ՀՖՖ նախագահի պաշտոնից հրաժարականից հետո 1,5 տարի իշխանության մեջ եղած Արթուր Վանեցյանը հարցազրույցում դրական էր պատասխանել հարցին, թե արդյոք այսօր հանրությունը մոլորությա՞ն մեջ է։ «Կասկած չունեմ, որ եթե Վանեցյանին հրահանգ իջեցվի վնասելու ՀՀ-ին, նա կբացահայտի պետական գաղտնիք»,- տեսակետ հայտնեց Սաֆարյանը։

Հարցազրույցն ամբողջությամբ՝ տեսանյութում։

Մարինե Խառատյան