Տարօրինակ է, որ Արթուր Վանեցյանը այդ մասին պաշտոնավարման ժամանակ լռել է. Ռուբեն Ռուբինյան. ՏԵՍԱՆՅՈՒԹ

Երեկ չորս ժամից ավելի տևած ՀՖՖ գործկոմի նիստից հետո ՀՀՖ նախագահ Արթուր Վանեցյանը հայտարարեց հրաժարականի մասին, մինչ դեկտեմբերի 23-ը նաև գործկոմի կազմն է փոխվելու: ՀՖՖ գործկոմի անդամ, ԱԺ արտաքին հարաբերությունների նախագահ Ռուբեն Ռուբինյանը Factor.am-ի հետ զրույցում անդրադառնալով ՀՖՖ նախագահի և գործկոմի փոփոխություններին, ասաց, որ միմյանց հետ կապ չունեցող գործընթացներ են: Սակայն, նշենք, որ Արթուր Վանեցյանը երեկ ֆանակումբների ներկայացուցիչների հետ հանդիպման ժամանակ ասել էր, որ հրաժարական կներկայացնի, եթե գործկոմն էլ նույնն անի:

«Անցած տարի ՀՖՖ-ն, որ ունեցավ նոր նախագահ և գործկոմ, կար հստակ օրակարգ՝ հայկական ֆուտբոլը պետք է մաքրվի: Որևէ մեկի համար գաղտնիք չէ, թե ինչ խնդիրներ կային ֆուտբոլում և ֆեդերացիայում: Վերջին շրջանում ազգային հավաքականը լավագույն արդյունքները չէր ապահվում և Իտալիայի հետ խայտառակ պարտությունը կատալիզատոր էր այն քննարկմանը, որը տեղի ունեցավ երեկ գործկոմում: Պարոն Վանեցյանը հրաժարական է տվել իր ցանկությամբ, իսկ գործկոմը ոչ թե հրաժարական է տվել, այլ որոշմամբ հրավիրել է ընդհանուր ժողով, որտեղ կընտրվի նոր գործկոմ: Այս երկու որոշումները իրարից անկախ են եղել: Հիմա պետք է իրականացվի մաքրման գործըթաց այն ՀԿ-ների ցանկում, որոնք ձևավորում են գործկոմը»,- ասաց նա:

Ռուբեն Ռուբինյանը հավաստիացնում է, որ հայկական ֆուտբոլի առողջացման գործընթացի արդյունքում են այս հրաժարականները, որոնք ոչ թե Արթուր Վանեցյանի՝ ԱԱԾ տնօրենի պաշտոնից ազատվելուց հետո է սկսվել, այլ իշխանափոխությունից հետո. «Ֆուտբոլի ֆեդերացիայում քննարկումները սկսվել և զարգացել են ֆուտբոլում տիրող իրավիճակի և ոչ գոհացուցիչ արդյունքներին զուգահեռ: Այն ինչ եղավ երեկ, եղավ վերջին խաղի արդյունքներից հետո»:

Ֆանակումբների կողմից քննադատվեց այն, որ գործկոմի անդամների զգալի մասը ՔՊ-ականներ են: Թեև Արեն Մկրտչյանը մեզ հետ զրույցում նշել էր, որ նրանցից յուրաքանչյուրը ինչ-որ առաքելություն էր իրականացնում, այնուհանդերձ, Ռուբինյանից հետաքրքրվեցինք՝ հնարավո՞ր է, որ նոր կազմում էլի ՔՊ-ականներ լինեն:

«Ես չեմ կարող ասել՝ կլինեն, թե՝ ոչ այն պատճառով, որ ես չեմ նոր գործկոմ ընտրողը: Կա մի քանի կարծիք՝ արդյոք ֆուտբոլը պետք է կառավարեն ֆուտբոլայի՞ն մասնագետները, թե՞ լավ մենեջերները: Ես, Արսեն Թորոսյանը, Սուրեն Պապիկյանը և մյուսները ֆեդերացիայում կատարում էինք հստակ գործառույթներ: Ես զբաղվում էի ոչ միայն վիզաներով, այլ նաև անձնագրի հետ կապված որոշակի հարցերով, ոչ միայն ֆուտբոլիստների, այլ նաև երկրպագուների: Իմ դիրքորոշումը հետևյալն է, որ անպայման չէ՝ ֆուտբոլի ղեկավարությունն ամբողջությամբ լինի կազմված ֆուտբոլային մասնագետներից: Անհրաժեշտ է լավ կառավարում, իսկ դրա համար պետք է ունենալ մինիմալ գիտելիքներ գուցե ոչ ֆուտբոլի տակտիկայից: Ես չեմ կարծում, որ մենք այս ընթացքում քաղաքականացրել ենք ֆեդերացիան»,- ասաց նա:

Արթուր Վանեցյանը երեկ հայտարարել էր, որ գործկոմի անդամներից շատերը, այնքան անտարբեր են ֆուտբոլի նկատմամբ, չգիտեն, թե անգամ որ ակումբներն են իրենց գործկոմի անդամ առաջադրել: Ռուբեն Ռուբինյանն այս կարծիքը չի կիսում: «Ինձ առաջադրել է «Փյունիկ» ֆուտբոլային ակումբը: Արթուր Վանեցյանի խոսքերի հետ համաձայն չեմ, բայց միևնույն ժամանակ պետք է հաշվի առնենք, որ պարոն Վանեցյանն այդ միտքն արտահայտել է մի քանի օր առաջ՝ երեկվա հրաժարականից առաջ, որի ակտուալությունը կորել է»:

Արթուր Վանեցյանը նշել էր, որ Հայաստանում կան քաղաքական ուժեր՝ ընդ որում ակտիվ քաղաքականության մեջ գտնվող, որոնք ֆինանսավորվում են դրսից: Ռուբեն Ռուբինյանը տարօրինակ է համարում, որ այդ կարևոր տեղեկությունը Արթուր Վանեցյանը ԱԱԾ տնօրեն եղած ժամանակ չի բարձրաձայնել:

«Ես այդպիսի տեղեկություն չունեմ: Տարօրինակ է, որ Արթուր Վանեցյանն այդ մասին պաշտոնավարման ժամանակ լռել է: Ես չգիտեմ, թե ինչու է լռել, այդ մասին իրենից պետք է հարցնել»մ- ասաց նա:

Ռուբեն Ռուբինյանն անդրադառնալով ԵԺԿ-ում Սերժ Սարգսյանի ելույթին, որ Հայաստանի ժողովրդավարությանը սպառնացող վտանգներ կան, ասաց. «Ես չեմ կարծում, որ Սերժ Սարգսյանը թեժացնում է ներքաղաքական կյանքը: Սերժ Սարգսյանը վաղուց կորցրել է որևէ բան թեժացնելու որևիցե ունակություն: Չեմ կարծում, որ Սերժ Սարգսյանը կարող է ասել կարևոր բան»:

Նիկոլ Փաշինյանը Միլանում ասել էր, որ «Ղեկավարը, որը չունի երկրի վստահությունը, ժողովրդի վստահությունը, անկախ անձերից, չարիք է երկրի համար այնպես, ինչպես, կներեք, չարիք են եղել երկրի բոլոր ղեկավարները՝ սկսած 1996 թվականից, երբ առանց ժողովրդի վստահության, տիրացել են իշխանությանը և փորձել են պահել այդ իշխանությունը»։ Ռուբեն Ռուբինյանից հետաքրքրվեցինք՝ սա չի՞ նպաստում, որ ՀԱԿ-ի և ՔՊ-ի միջև տարաձայնություններ առաջանան, քանի որ երեկ ՀԱԿ ներկայացուցիչները կոշտ քննադատեցին ՀՀ վարչապետին:

«ՀԱԿ-ի և ՔՊ-ի միջև տարաձայնություններ կան, ինչպես, որ տարաձայնություններ կան ՔՊ-ի և մնացած բոլոր կուսակցությունների միջև: Եթե չլինեին տարաձայնություններ, ապա չէին լինի տարբեր կուսակցություններ: Տարբեր քաղաքական ուժեր տարբեր դիրքորոշումներ կարող են ունենալ տարբեր հարցերի շուրջ, դրանք կարող են բերել սուր քննադատությունների, կատաստրոֆա չեմ տեսնում»,- ասաց նա:

Մանրամասները՝ տեսանյութում:

Նարեկ Կիրակոսյան