«Բազմաթիվ բաներ կան, որոնք պարոն Վանեցյանն իրավունք չունի անցնելու»․ ԱԱԾ նախկին տնօրենի հարցազրույցը մեկնաբանում են պատգամավորները. ՏԵՍԱՆՅՈՒԹ

«Իմ քայլը» խմբակցության պատգամավոր Արփինե Դավոյանը չի կարծում, թե ԱԱԾ նախկին ղեկավար Արթուր Վանեցյանը կարող էր տարակարծություններ ունենալ վարչապետ Նիկոլ Փաշինյանի հանձնարարականների հետ և այդ պատճառով հրաժարական տալ, ինչի մասին երեկ Արթուր Վանեցյանն ասել է անձամբ։

«Եթե կա նման հայտարարություն, պետք է այդ հայտարարությունը պարզաբանվի կոնկրետ օրինակներով և նախկին պաշտոնյան, երբ նման հայտարարություններ է անում, պետք է դրա տակ լինեն փաստարկներ։ Առանց փաստարկի այդ հայտարարությունները զուտ հայտարարություններ են, ոչինչ չասող»,- ասում է ԱԺ «Իմ քայլը» խմբակցության անդամ Արփինե Դավոյանը։

Ըստ պատգամավորի, Արթուր Վանեցյանը պետք է ժամանակին խոսեր, թե Նիկոլ Փաշինյանի որ հանձնարարականների հետ համաձայն չի եղել․ «Գուցե ավելի շուտ լիներ նրա հրաժարականը, ոչ թե սպասեր իրադարձությունների նման զարգացմանը»։

Պարոն Վանեցյանը խոստացել է առաջիկայում ավելի մանրամասն խոսել երկրում ստեղծված մթնոլորտի մասին։ Արփինե Դավոյանն ընդամենը ինտրիգ է տեսնում ԱԱԾ նախկին ղեկավարի այդ հայտարարության մեջ։ Պատգամավորը չի կասկածում, որ Արթուր Վանեցյանը լիքը ասելիք կունենա, բայց պետք է չափավորի իր ախորժակը։

«Պետական գաղտնիքի մասին օրենք կա, բազմաթիվ բաներ կան, որոնք նա իրավունք չունի անցնելու, և կարծում եմ, առաջինն ինքը պետք է մտածի, թե ինչ պիտի խոսի»,- զգուշացնում է իշխանական պատգամավորը։

Ընդդիմադիր պատգամավոր Տարոն Սիմոնյանը նկատում է, որ Արթուր Վանեցյանը՝ որպես ԱԱԾ նախկին տնօրեն, պետք է իրեն հաշիվ տա խոսելիս, նրան կաշկանդում է նաև իր ծառայության մասին օրենքը։

«Դու ունես նաև տեղեկատվություն թե՛ ներիշխանական հարաբերություններից, թե՛ արտաիշխանական հարաբերություններից և, եթե դա հանրայնացնես, կարող է ազգային անվտանգության հարց առաջանալ»,- ենթադրում է ԱԺ «Լուսավոր Հայաստան» խմբակցության անդամ Տարոն Սիմոնյանը։

Նա չի բացառում, որ Արթուր Վանեցյանը տիրապետում է գործող իշխանությունների հնարավոր դատապարտելի վարքագծին վերաբերող տեղեկությունների, բայց նույնիսկ այդ դեպքում պետք է զգուշանա խոսելիս․ «Դա լսվում է ոչ միայն Հայաստանի ներսում, այլ նաև Հայաստանի սահմաններից դուրս, իսկ մենք, ինչպես բոլորս գիտենք, բավականին խնդրահարույց վիճակում ենք գտնվում հարևանների պատճառով»։

Ի դեպ, Արթուր Վանեցյանը երեկվա հարցազրույցում հասկացրել է, որ իր հոր ընկերությունում հրաժարականից անմիջապես հետո սկսված ստուգումները կապ ունեն հենց հրաժարականի հետ։ Ընդդիմադիր պատգամավորը դա չի բացառում։

«Ամեն դեպքում իշխանությունը գայթակղություն է։ Երբ ունենում ես հնարավորություն քո կամքը թելադրելու բոլոր հնարավոր անձանց վրա, դու չես կաշկանդվում այդ կամքը թելադրելուց և այդ հնարավորությունը բաց չես թողնում»,- եզրակացնում է Տարոն Սիմոնյանը։

Մհեր Արշակյան