Քաղաքականություն
20.11.2019 | 12:32Ոչ վաղ անցյալում մեր գործընկեր Սիսակ Գաբրիելյանը հանդես է եկել Արսեն Բաբայանի խափանման միջոց կալանքը փոխելու երաշխավորությամբ, սակայն դա չի նշանակում, որ պարոն Գաբրիելյանը դրական է վերաբերվում պարոն Բաբայանի կողմից կատարված կամ ենթադրաբար կատարած արարքին: Այս մասին ԱԺ ճեպազրույցների ժամանակ ասաց ԱԺ պետաիրավական հանձնաժողովի անդամ Սուրեն Գրիգորյանը՝ անդրադառնալով հարցին, թե՝ եթե պայքարում ենք քրեական ենթամշակույթ կրողների դեմ, ապա ինչպե՞ս կմեկանաբանի այն, որ հեղափոխությունից հետո Սասուն Միքայելյանը հանդես էր եկել Ալիկ Բանդուրյանի՝ Նորատուսցի Ալիկի խափանման միջոցը փոխելու երաշխավորությամբ:
Սուրեն Գրիգորյանն ասաց, որ թացը չորից պետք է տարբերել: «Երևույթը հեևյալն է. ես չեմ ասում, որ պարոն Բաբայանը քրեական հեղինակություն է կամ էդ առումով չեմ համեմատում, խոսքն այլ բանի մասին է: Ցանկացած անձ, եթե քրեական հեղինակություն է կամ կատարել է հանցագործություն, թե չի կատարել, քաղաքացի է, ում ազատությունը պետք է սահմանափակվի բացառապես օրենքով սահմանված դեպքերում: Հիմա, եթե պարոն Միքայելյանը գտել է, որ անգամ քրեական հեղինակություն լինող անձի ազատազրկման հիմքեր չկան և քննության նպատակներից չի բխում, որ էդ անձը գտնվի անազատության մեջ և երաշխավորագիր է ներկայացրել, ապա պետք չի երբեք դիտարկել, որ ինքը խրախուսում է հանցագործությունը»,- նկատեց նա:
Սուրեն Գրիգորյանը հորդորեց հարցն ուղղել Սասուն Միքայելյանին:
Հիշեցնենք, որ հեղափոխությունից հետո Ազգային ժողովի «Ելք» խմբակցության պատգամավոր Սասուն Միքայելյանն ու ԱԺ «Ծառուկյան» դաշինքի 9 պատգամավոր քրեական հեղինակություն Նորատուսցի Ալիկ մականունով հայտնի Ալիկ Բանդուրյանի համար անձնական երաշխավորություն էին ներկայացրել դատարան, սակայն դատարանը մերժել էր: Պատգամավորներն էին՝ Արարատ Զուրաբյանը, Արթուր Մանուկյանը, Սերգեյ Բագրատյանը, Վահան Հայրապետյանը, Դավիթ Մանուկյանը, Հրանտ Մադաթյանը, Մերուժան Սիմոնյանը, Տիգրան Ստեփանյանը, Արայիկ Աղաբաբյանը: Նրանք, ինչպես նաև Սասուն Միքայելյանը, Բանդուրյանի վերաբերյալ երաշխավորագրում նշել էին, որ սույն գործով ամբաստանյալ Ալիկ Բանդուրյանն ազատ արձակվելու դեպքում չի խոչընդոտի գործի քննությանը, վարույթն իրականացնող մարմնից չի թաքնվի, ինչպես նաև չի դրսևորի ոչ պատշաճ վարքագիծ: Նիկոլ Փաշինյանը Սասուն Միաայելյանի քայլը քննադատել էր:
Մանրամասները՝ տեսանյութում:
Նարեկ Կիրակոսյան
