13.01.2026 | 12:12
Միրզոյան-Ռուբիո հանդիպում կլինի // Կրասնոդար-Երևան չվերթը կրկին չեղարկվել է․ ԼՈՒՐԵՐ
Զենքի տեղաշարժը վերահսկելու իրավունքը տալիս ենք ՌԴ–ին. «Ազատ դեմոկրատները» մտահոգված են. «Փաստ»
10.10.2017 | 09:14
«Փաստ» օրաթերթը գրում է.
«Ազատ դեմոկրատներ» կուսակցությունն անընդունելի է համարում Աժ–ի ընդունած ՌԴ–ից ՀՀ–ին մատակարարվող ռազմական նշանակության արտադրանքի առկայության և նպատակային օգտագործման նկատմամբ հսկողության իրականացման կարգի մասին համաձայնագիրը:
Արտախորհրդարանական ուժի գնահատմամբ՝ այս համաձայնագրով զենքի տեղաշարժը վերահսկելու իրավունքը տալիս ենք Ռուսաստանի Դաշնությանը, ինչը շատ վտանգավոր է:
«Համաձայնագրում նշվում է, որ Ռուսաստանից Հայաստանին մատակարարված զինատեսակների վերահսկողության իրավունք ունի իրականացնելու Ռուսաստանը: Նշված է, թե ինչպես են իրականացնելու՝ հանձնաժողով է ստեղծվելու, որը գալու է տեսնի, թե որտեղ է տեղակայվելու և ինչ նպատակներով է օգտագործվելու զենքը: Սա կարելի է ասել հստակ ռազմական գաղտնիք է և մենք օրենքի ուժով հնարավորություն ենք տալիս, որ Ռուսաստանը տիրապետի մեր ռազմական գաղտնիքին: Թե զենքն աշխարհագրորեն որտեղ է տեղակայվելու և ինչ նպատակներով է օգտագործվելու, դա արդեն ՀՀ–ի սուվերեն իրավունքն է»,– իրենց մտահոգությունները «Փաստ» օրաթերթի թղթակցի հետ զրույցում ներկայացրեց կուսակցության փոխնախագահ Անժելա Խաչատրյանը:
Նա նաև նշեց, զենքի վերահսկողության առկայությունը կարող է թուլացնել ՀՀ–ի և Արցախի անվտանգության ապահովումը։
«ՀՀ–ի և Արցախի անվտանգության համակարգը միասնական է, իսկ 2013 թվականից հետո ՌԴ–ից ձեռք բերված ռազմական տեխնիկայի մեջ կան ՀՀ–ի և Արցախի անվտանգության ապահովման համար առանցքային նշանակության զինատեսակներ, ապա նման համաձայնագրի առկայության պարագայում ՌԴ–ն կարող է օրենքի ուժով խոչընդոտել թե՛ դրանց աշխարհագրական տեղաշարժին և թե՛ նպատակային կիրառելիությանը»,– ընդգծեց կուսակցության փոխնախագահը:
«ՀՀ զինված ուժերի և Ռուսաստանի Դաշնության զինված ուժերի միացյալ խմբավորման մասին» համաձայնագիրը չի բխում մեր երկրի անվտանգության շահերից. շտապում է հայտնել Անժելա Խաչատրյանը: Ազատ դեմոկրատներ կուսակցությունը ՀՀ– ՌԴ ԶՈՒ միացյալ խմբավորում ստեղծելու դեպքում ևս վտանգներ է նկատել:
«Մեկ տարուց ավելի այս նախագիծը կա ԱԺ–ում: Երբ մենք պատգամավոր ունեինք խորհրդարանում, մենք միացյալ խմբավորում ստեղծելու կապակցությամբ հարցում կատարեցինք Պաշտպանության նախարարություն: Նրանք, սակայն, հստակ պատասխան չկարողացան տալ, թե պատերազմական վիճակում ում է ենթարկվելու զորամիավորումը: Սա վկայում է այն մասին, որ հայկական կողմն ամբողջությամբ տեղեկացված չէ զորամիավորում ստեղծելուց: Կան խնդիրներ, որոնք պաշտպանության նախարարությունը չի ուզում բարձրացնել»,– փոխանցեց նա:
Խաչատրյանը նկատեց, որ նմանատիպ պարտավորություն Հայաստանը Ռուսաստանի և այլ երկրների հետ արդեն ունի, բայց նրանք այդպես էլ ադրբեջանական վտանգը չեզոքացնելու հարցում օգնություն ցույց չեն տվել:
Արտախորհրդարանական ուժն օգտագործելով իր լծակները՝ մարդկանց կիրազեկի, թե վերոնշյալ երկու համաձայնագրերն ինչ վտանգ են ներկայացնում Հայաստանի համար:
Մանրամասները՝ թերթի այսօրվա համարում:
