Այդ ինստիտուտը խնդիրներ է առաջացրել. Անդրանիկ Քոչարյանը՝ Մովսես Հակոբյանի պաշտոնանկության մասին. ՏԵՍԱՆՅՈՒԹ

Դա խոսում է այն մասին, որ այդ ինստիտուտը խնդիրներ է առաջացրել, և վարչապետը կայացրել է որոշում. այս մասին ԱԺ-ում լրագրողների հետ զրույցում նշեց ԱԺ «Իմ քայլը» խմբակցության պատգամավոր, խորհրդարանի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով փաստին, որ այսօր վարչապետի որոշմամբ Մովսես Հակոբյանն ազատվել է գլխավոր ռազմական տեսուչի պաշտոնից:

Աշխատանքից ազատվել են նաև նրա երկու տեղակալները: Անդրանիկ Քոչարյանն այդ քայլը չի կապում Մովսես Հակոբյանի՝ ԱԺ քննիչ հանձնաժողով հրավիրելու հետ, ասում է` միգուցե Մովսես Հակոբյանն է դիմում գրել:

Լրագրողի հարցին, թե պաշտոնանկությունից հետո այլևս չեն կարող նրան հրավիրել Ապրիլյանի հանձնաժողով, Քոչարյանը նկատեց, որ իրենք ոչ մեկին էլ չեն պարտադրում, ում էլ որ հրավիրում են, հաճույքով են գալիս: «Պետք չէ այլ բաներ փնտրել, հետևեք պաշտոնական տեղեկատվությանը»,- ասաց նա:

Լրագրողի դիտարկմանը, թե Մովսես Հակոբյանը նախկին իշխանության հետ էր ասոցացվում, Անդրանիկ Քոչարյանը նկատեց, որ զինվորականությունը ընդհանրապես իր ծառայությունները մատուցել է բոլոր իշխանությունների ժամանակ. «Ուրիշ բան, որ տարբեր ժամանակաշրջանում, մեր զինվորականության նկատմամբ մի քիչ այլ վերաբերմունք է եղել, որովհետև եղել է նաև իշխանություն, որը որ մեր բանակին հասցրել է մեծ վնաս՝ նրանց օգտագործելով ներքաղաքական խնդիրների մեջ, ինչպես որ եղել է Մարտի 1-ը: Նորից եմ ասում` մեր բանակը պետք է զերծ մնա նման օգտագործման հնարավորությունից և այսօրվա իշխանությունները բացառում են նման բան երբևիցե»:

Մանրամասները՝ տեսանյութում։

Նարեկ Կիրկոսյան