Քաղաքականություն
14.11.2019 | 14:48ԱԺ պատգամավոր Արման Բաբաջանյանը Կառավարությունից դեռևս պատասխան չի ստացել Սահմանադրական դատարանն ու պետական այլ կառույցներ մարզեր տեղափոխելու առաջարկի վերաբերյալ: Այս մասին պատգամավորն ասաց խորհրդարանում լրագրողների հետ զրույցում պատասխանելով Factor.am-ի հարցին:
«Բայց մեկ այլ նախաձեռնության շրջանակում հանդիպել եմ փոխվարչապետ Տիգրան Ավինյանի հետ, ում հետ քննարկել եմ այդ հարցը: Առհասարակ՝ ապակենտրոնացումը և գերբեռնված Երևանի թոթափումը, կարծում եմ, մեր ուշադրության առարկան պիտի լինի»,- ասաց Արման Բաբաջանյանը:
Նրա խոսքով՝ այդ կառույցները կարող են տեղափոխվել, օրինակ, Չարենցավան, Գավառ, Վանաձոր:
Հարցին՝ ինչո՞ւ է հանդիպել Տիգրան Ավինյանի հետ, պատգամավորը պատասխանեց. «Ամռանն այցելում էի Վայոց ձորի սահմանապահ բնակավայրեր: Պլանավորում ենք Վայոց ձորում ստեղծել գյուղատնտեսական մեծ լոգիստիկ կենտրոն, և առաջիկայում ես հրավեր ունեմ այցելելու Իսպանիա: Քննարկում էինք դրա նպատակահարմարության հարցը»,- ասաց պատգամավորը՝ հավելելով, որ քաղաքական հարցեր չեն քննարկել:
Մանրամասները՝ տեսանյութում:
