Հայտնի միջադեպից հետո ու՞ր է անհետացել Գևորգ Պետրոսյանը. նրան վերջին անգամ տեսել են Ծառուկյանի հետ. ՏԵՍԱՆՅՈՒԹ

Ազգային ժողովում այսօր տեղի ունեցած միջադեպից հետո, երբ ԲՀԿ-ական պատգամավոր Գևորգ Պետրոսյանը չվերադարձավ նիստերի դահլիճ, «Իմ քայլի» մի շարք պատգամավորներ ասացին, թե Պետրոսյանը, իբր, գնացել է Գագիկ Ծառուկյանի հետ՝ հավելելով, որ Ծառուկյանը, գուցե, նրա հետ շատ լուրջ խոսակցություն ունի՝ կապված ԱԺ-ում նրա հայտարությունների հետ:

ԲՀԿ-ական պատգամավոր Արման Աբովյանը լրագրողների հետ զրույցում ասաց, որ Գևորգ Պետրոսյանը Գագիկ Ծառուկյանի հետ չի գնացել, այլ Դեմիրճյան փողոցում հանդիպում ուներ:

«Չգիտեմ՝ ինչու են մեր գործընկերներ նման ենթադրություն արել, թե Ծառուկյանը Պետրոսյանի հետ լուրջ խոսելիք ունի, գուցե նրանցից հարցնեք: Ըստ էության, նրանց ենթադրության դաշտից է այդ ամենը»,- նշեց Արման Աբովյանը:

Դիտարկմանը, որ «Իմ քայլի» պատգամավորները հայտարարում են, թե Գևորգ Պետրոսյանն իր նախագծերով արջի ծառայություն է մատուցում Գագիկ Ծառուկյանին, Արման Աբովյանը նկատեց՝ գոյություն ունեն տարբեր տեսակետներ, և յուրաքանչուր պատգամավոր կարող է իր տեսակետը հայտնել:

«Հիմա ես զերծ կմնամ մեկնաբանել, թե ով ում ինչ ծառայություններ է մատուցում: Կարող եմ ասել մի բան, որ ԲՀԿ-ն լիովին կիսում է պարոն Պետրոսյանի դիրքորոշումը բոլոր այն հարցերի շուրջ, որոնք բարձրացրել է նա: Պետք չէ փնտրել ենթատեքստեր այս կամ այն կողմից, գոյություն ունի հստակ ու պարզ դիրքորոշում, մենք մեր դիրքորոշումն արտահայտեցինք, մեր գործընկերները՝ իրենց: Լարված խոսակցություն էր: Այստեղ արտառոց բան չեմ տեսնում»,- շեշտեց պատգամավորը:

Անդրադառնալով ԱԺ փոխնախագահ Ալեն Սիմոնյանի բնորոշմանը, որ Գևորգ Պետրոսյանի բերած նախագիծը քաղաքական նպատակ ունի և սպառնալիքին, թե ԲՀԿ-ին կհիշեցնի իր անցյալը, Արման Աբովյանն ասաց. «Եթե մենք սկսենք իրենց հիշեցնել, լավ բան չի լինի, էլի… Մենք բոլորս աշխատում ենք միասին, և յուրաքանչյուր պատգամավոր իրավունք ունի արտահայտելու իր կարծիքը»:

Թե ինչ պետք է հիշեցնի Ալեն Սիմոնյանին, Արման Աբովյանը չմանրամասնեց:

Մանրամասները՝ տեսանյութում:

Նարեկ Կիրակոսյան