Արցախի թեմն ազատվել է գույքահարկից և հողի հարկի գծով առաջացած պարտավորություններից

Նախօրեին կայացած լիագումար նիստում Խորհրդարանը 30 կողմ ձայնով ընդունել է «Գույքահարկի մասին» օրենքում լրացումներ կատարելու մասին» և դրան կից՝ «Հողի հարկի մասին» օրենքում փոփոխություն և լրացումներ կատարելու մասին» օրենքների նախագծերը:

«Արցախպրես»-ի թղթակցի հաղորդմամբ՝ ներկայացնելով նախագծերը՝ ԱՀ ֆինանսների նախարար Արթուր Հարությունյանը նշել է, որ առաջարկվում է գործող օրենսդրության նորմերին համապատասխան՝ սահմանել արտոնություն Հայաստանյաց Առաքելական Սուրբ եկեղեցու Արցախի թեմին սեփականության իրավունքով պատկանող՝ հուշարձանի կարգավիճակ չունեցող եկեղեցիների, հոգևոր-մշակութային, կրթադաստիարակչական, եկեղեցական և ծիսական պարագաների արտադրության և իրացման համար օգտագործվող շենքերի ու շինությունների համար հաշվարկվող գույքահարկից և դրանց սպասարկման ու օգտագործման  համար անհրաժեշտ հողամասերի հողի հարկից, ինչպես նաև ազատել մինչև 2019թ.-ի հունվարի 1-ը հաշվարկված գույքահարկի և հողի հարկի գծով առաջացած պարտավորություններից:

«Ներկայումս «Գույքահարկի մասին» օրենքի  15-րդ հոդվածի 1-ին մասի 3-րդ կետի համաձայն՝ գույքահարկից ազատվում են կրոնական կազմակերպություններին սեփականության իրավունքով պատկանող մինչև 1991 թվականը կառուցված օրենսդրությամբ սահմանված դասակարգմանը համապատասխան կրոնական և պաշտամունքային շենքերն ու շինությունները, ինչը հնարավարություն չի տալիս Հայաստանյաց Առաքելական Սուրբ եկեղեցու Արցախի թեմի նկատմամբ գույքահարկի և հողի հարկի մասով կիրառել ամբողջական արտոնությունը»,- նշել է Ա. Հարությունյանը:

Գլխադասային՝ ԱԺ ֆինանսաբյուջետային և տնտեսական կառավարման հարցերի մշտական հանձնաժողովն օրենքի նախագծին տվել է դրական եզրակացություն: