ՀՀ ոստիկանությունը խոչընդոտել է ընտրակաշառքների բաժանման փաստի բացահայտմանը ու լծվել է ՀՀԿ-ի օգտին ձայներ բերելու գործին. «Ելք»-ի հայտարարությունը (տեսանյութ)

«Ելք» կուսակցությունների դաշինքը հրապարակել է իր եզրափակիչ հայտարարությունը ընտրությունների արդյունքներրի վերաբերյալ: Հայտարարությունը հրավիրված մամուլի ասուլիսի ընթացքում ներկայացրել է դաշինքի անդամ Էդմոն Մարուքյանը.

«Ելք» կուսակցությունների դաշինքը Երևանի ավագանու ընտրությունների վերաբերյալ  հարկ է համարում արձանագրել  հետևյալը.

Ընտրությունների պաշտոնական արդյունքները ընդհանուր առմամբ ձևավորվել են ընտրություններին մասնակցած քաղաքացիների քվեարկության արդյունքում և «Ելք» դաշինքին հաջողվել է արձանագրել իր օգտին տրված յուրաքանչյուր քվե:

Ընտրական պրոցեսի ընթացքում Հանրապետական կուսակցության նախընտրական շտաբներից համատարած ընտրակաշառքներ են բաժանվել: Այդ գործընթացն ունեցել է կազմակերպված և կենտրոնացված բնույթ, ինչի վերաբերյալ «Ելք» դաշինքին հաջողվել է ձեռք բերել անառարկելի ապացույցներ:

ՀՀ իրավապահ մարմինները ընտրակաշառքների դեմ պայքարում ցուցաբերել են համատարած անգործություն, իսկ որոշ դեպքերում հովանավորել են այդ գործընթացը` ընդհուպ խոչընդոտելով կատարված ընտրական հանցագործությունների  բացահայտմանը:

 «Ելք» դաշինքը ապացույցներ է ձեռք բերել, որ ՀՀ ոստիկանությունը լծված է եղել  Հայաստանի Հանրապետական կուսակցության օգտին ձայներ ապահովելու գործին, ինչը կոպտորեն հակասության մեջ է մտնում «Չեզոքության մասին» ՀՀ օրենքի պահանջների հետ:

 Քվեարկության օրը ոստիկանության ներկայացուցիչները բռնություն են գործադրել «Երկիր ծիրանի» կուսակցության համամասնական ցուցակը գլխավորող Զարուհի Փոստանջյանի և նրա դստեր նկատմամբ, ըստ էության, խոչընդոտելով ընտրակաշառքների բաժանման հերթական փաստի բացահայտմանը:

…«Ելք» դաշինքը ռազմավարական նպատակ է հռչակում Հայաստանի քաղաքացիների շրջանում տիրապետող հուսահատության մթնոլորտի հաղթահարումը և ամեն ինչ անելու է այս նպատակին հասնելու համար»:

Էդմոն Մարուքյանի՝ դաշինքի հայտարարությունը ներկայացնելուց հետո «Ելք» դաշինքի քաղաքապետի թեկնածու Նիկոլ Փաշինյանը հայտարարեց, որ  չի վերցնում ավագանու մանդատը և գնում է ԱԺ․ «Էս պահին պարզ է մի բան՝ ես գնում եմ Ազգային ժողով, մյուսներն արդեն հավաքած ձայներին համապատասխան՝ գնում են ավագանի»:

Հիշեցնենք, որ երեկ կայացան Երևանի ավագանու ընտրությունները: ԿԸՀ-ն ներկայացրել է քվեարկության նախնական արդյունքները, ըստ որի`

«Ելք» կուսակցությունների դաշինքը ստացել է ձայների 21%-ը (70 731 քվե), «Երկիր Ծիրանի» կուսակցությունը՝ 7.75% (26 109 քվե), իսկ ՀՀԿ-ն 71.25% (240 036 քվե):

Նշենք նաև, որ Երևանի ավագանու ընտրություններին մասնակցում էր 2 կուսակցություն՝ ՀՀԿ-ն  ու «Երկիր Ծիրանին» և մեկ կուսակցությունների դաշինք՝ «Ելքը»։