Հրապարակային գործարք է առաջարկվում ոճրագործին, դա հնչում է իշխանության ներկայացուցչի շուրթերից․ Արծվիկ Մինասյան․ ՏԵՍԱՆՅՈՒԹ

Հրապարակային գործարք է առաջարկվում ոճրագործին և դա անթաքույց հնչում է իշխանությունը ներկայացնող անձի շուրթերից: Այս մասին այսօր՝ հոկտեմբերի 27-ին լրագրողների հետ զրույցում ասաց ՀՅԴ Հայաստանի ԳՄ անդամ Արծվիկ Մինասյանը:

«Քրեական գործում կա առանձնացված մաս, և այն գտնվում է իրավասու մարմինների լիազորությունների ներքո: Այս մասով ընթացքը երբեք չի կասեցվել, սակայն ուզում եմ բոլորիդ ուշադրությունը հրավիրել ներքաղաքական այս իրավիճակում հրապարակ նետվող այն թեզերի վրա, որոնցով, փաստորեն, հրապարակային գործարք է առաջարկվում ոճրագործին, և դա անթաքույց նաև հնչում է իշխանության ներկայացուցչի շուրթերից: Անձինք էլ կան, որ քսան տարի լռել են, և այսօր ունենալով բարձր, պատասխանատու պաշտոն, հրապարակային հնչեցնում են մի բան, որը, ըստ էության, հանցագործի, ոճրագործի հետ գործարքի առաջարկ է: Ես նկատի ունեմ նույն Արման Բաբաջանյանին: Տարբեր առաջարկները խոսում են այն մասին, որ մարդիկ փորձում են օրակարգում կեղծ թեզեր առաջ քաշել և շեղել պետության ու հանրության ուշադրությունը անվտանգության համակարգերից»,- նշեց Արծվիկ Մինասյանը:

Լրագրողի հարցին, թե գործարք ասելով՝ ի՞նչ նկատի ունի, Մինասյանը պարզաբանեց. «Այսինքն՝ տվեք անուններ և փորձենք ձեզ օգտակար լինել, մինչդեռ թե՛ քրեական գործի, թե՛ նախաքննության, թե՛ դատավարական ընթացքը ամբողջությամբ այսօր արխիվացված նյութերը վեր հանելու դեպքում, շատ մանրամասն կարող են դիտարկել օտարերկրյա այնպիսի ներգրավումը, որը, չգիտես ինչու, պետական իրավասու մարմիններն անտեսել են և փորձում են դա փոխարինել Նաիրի Հունանյան կոչվող անձնավորության ինչ-որ հայտարարություններով, ինչ-որ դիմումներով: Սա խոսում է այն մասին, որ, իմ խորին համոզմամբ և մեր վերլուծությամբ, Հայաստանում շարունակում է չգիտակցված մնալ անվտանգության համակարգերն ամեն օր ուժեղացնելու օրախնդիրը»:

Մանրամասները՝ տեսանյութում:

Նարեկ Կիրակոսյան