Հրայր Թովմասյանն ուզում է, որ իր հարցը դառնա քաղաքական. Հովհաննես Իգիթյան. ՏԵՍԱՆՅՈՒԹ

Մենք ժամանակին տեսել ենք՝ ինչ է նշանակում քաղաքական դրդապատճառներով հալածանք։ Այս մասին ԱԺ-ում ճեպազրույցների ժամանակ ասաց «Իմ քայլը» խմբակցության պատգամավոր Հովհաննես Իգիթյանը՝ չհամաձայնելով այն մտքի հետ, որ ԱԺ աշխատակազմի նախկին ղեկավարի տեղակալ Արսեն Բաբայանի նկատմամբ քաղաքական հետապնդում է իրականացվում։

«Կանչում են մարդուն, հարցեր են տալիս, օրինակ՝ դիմումը ե՞րբ է եկել, գրանցե՞լ եք, թե՝ չէ, ե՞րբ եք ուղարկել: Այդ մարդուն կանչում են, ոչ թե մտնում են տուն, դուռը ջարդում, առանց սանկցիայի որպես վկա թևերը ոլորում տանում։ Հարուցվել է գործ, և գործի շրջանակներում հանգամանքներ կան, որոնք պետք է պարզվեն։ Եվ այդ հանգամանքների համար հարցեր են տրվում մարդուն։ Եթե դա համարվում է քաղաքական հալածանք, ապա քաղաքակիրթ ամբողջ աշխարհում բոլորին հալածում են, որովհետև ամեն տեղ հարցեր են տալիս և սպասում ճշգրիտ պատասխանի»,- ասաց Իգիթյանը։

Վերջինս նկատեց, որ Հրայր Թովմասյանն ինքն ուզում է, որ իր հարցը դառնա քաղաքական։

«Վերջին իր հայտարարությունները մենք ուշադիր լսում ենք, որովհետև հիմա մենք համագործակցում ենք թե՛ Եվրամիության, թե՛ ԵԽԽՎ-ի հետ այդ հարցով, ուզում ենք գտնել Սահմանադրական լուծում ճգնաժամ, այլ ոչ թե Հրայր Թովմասյանի հարց։ Եվ Հրայր Թովմասյանն անընդհատ անում է քաղաքական հայտարարություններ և սրանով փորձում է քաղաքականացնել։ Մենք մեր կողմից փորձում ենք ամեն ինչ անել, որ հարցը դիտվի իրավական հարթակներում»,- իր խոսքը եզրափակեց պատգամավորը։

Մանրամասները՝ տեսանյութում։