03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Կառավարության նիստի օրակարգում Սարհատ Պետրոսյանին ազատելու նախագիծն առայժմ ընդգրկված չէ
Քաղաքականություն
23.10.2019 | 22:51
Կառավարության կայքում հրապարակվել է հոկտեմբերի 24-ի նիստի օրակարգը: Այս պահին օրակարգում ընդգրկված չէ Կադաստրի պետական կոմիտեի ղեկավար Սարհատ Պետրոսյանին աշխատանքից ազատելու որոշման նախագիծը:
Հիշեցնենք, որ Կադաստրի կոմիտեի ղեկավար Սարհատ Պետրոսյանը հոկտեմբերի 18-ին հրաժարականի դիմում էր ներկայացրել վարչապետ Նիկոլ Փաշինյանին: Վարչապետի մամուլի խոսնակը Factor.am-ի հարցին ի պատասխան ասել էր, որ Սարհատ Պետրոսյանի աշխատանքից ազատման դիմումին Կառավարությունը կանդրադառնա առաջիկա նիստի ժամանակ:
Որպես աշխատանքից ազատվելու պատճառ՝ Սարհատ Պետրոսյանը ֆեյսբուքում նշել էր, որ չի կիսում Կառավարության քաղաքականությունը քաղաքաշինության բնագավառում: Պետրոսյանի խոսքով՝ կառավարման որոշակի մակարդակներում կոնկրետ ոլորտների զարգացման համընդհանուր տեսլական պետք է լինի, որը տվյալ դեպքում չկա: Չնայած անշարժ գույքի շուկայում աննախադեպ ակտիվություն է, քաղաքաշինության ոլորտում հետընթաց կա՝ հանձինս քաղաքաշինության կոմիտեի ներկա և նախկին ղեկավարների քաղաքականություն հիշեցնող իներցիոն իմիտացիաների։
Սարհատ Պետրոսյանը նշել է, որ այլևս չի կարող հանդուրժել դիլետանտիզմն ու կոռումպացվածության հասնող թայֆայականությունը: Պետրոսյանից իր հրաժարականի վերաբերյալ լրացուցիչ մեկնաբանություններ ստանալ մեզ առայժմ չի հաջողվել։
Նարեկ Կիրակոսյան
