30.04.2026 | 19:47
Չեմպիոնների լիգայում հայտնի է շաբաթվա լավագույն ֆուտբոլիստը
Կատալոնիայում անկարգությունների ընթացքում 7.3 մլն եվրոյի վնաս է հասցվել
Քաղաքականություն
23.10.2019 | 17:19
Իսպանիայի Զարգացման նախարարությունը հաշվարկել է, որ Կատալոնիայում բողոքի ակցիաների ընթացքում տեղ գտած անկարգությունների հետևանքով 7.3 մլն եվրոյի վնաս է հասցվել: Այս մասին գրում է ՏԱՍՍ-ը՝ վկայակոչելով Radio y Television Espanola-ն:
Աղբյուրի փոխանցմամբ՝ զգալի վնաս է կրել տարածաշրջանի տրանսպորային ենթակառուցվածքը:
Գերատեսչությունում ընդգծել են, որ Բարսելոնայի օդանավակայանում ցույցի մեկ օրվա ընթացքում, որի պատճառով տասնյակ չվերթներ են չեղարկվել, տարածաշրջանը 1.2 մլն եվրո է կորցրել: Ցույցերի օրերին շուրջ 4 մլն եվրոյի վնաս էլ կրել են ձեռնարկությունները:
Ընդհանուր առմամբ, Զարգացման նախարարության հաշվարկներով, Բարսելոնայում անցկացված ցույցերի հետևանքով ուղղակի կամ անուղղակի 190 հազար մարդ է տուժել:
Հոկտեմբերի 14-ին Իսպանիայի Գերագույն դատարանը հրապարակեց կատալոնցի 12 քաղաքական գործիչների գործերով վճիռները՝ կապված 2017 թվականի անկախության հանրաքվեին նրանց մասնակցության հետ: Դրանից հետո ինքնավարությունում բողոքի ակցիաներ և անկարգություններ սկսվեցին:
Կատալոնիայի տարբեր քաղաքներում բախումների ընթացքում մի քանի հարյուր մարդ է տուժել, այդ թվում՝ ավելի քան 300 իրավապահ: Վերջին տվյալներով՝ հիվանդանոցներում դեռևս 8 մարդ կա, որոնցից մեկի վիճակը ծայրահեղ ծանր է, 5-ինը՝ ծանր: Շուրջ 200 մարդ ձերբակալվել է, որոնցից 30-ը դեռևս անազատության մեջ են:
