10.12.2025 | 23:29
ԱՄՆ Կոնգրես է ներկայացվել 907 ուղղումն ամբողջությամբ չեղյալ համարելու մասին օրինագիծ
Եթե Անկարան շարունակի Սիրիայում գործողությունը, ԱՄՆ-ն լայնածավալ պատժամիջոցներ կկիրառի. Փենս
Քաղաքականություն
23.10.2019 | 12:57
ԱՄՆ-ն պատրաստ է պատժամիջոցներ սահմանել Թուրքիայի դեմ, եթե այդ երկրի իշխանությունները որոշեն շարունակել ռազմական գործողությունը Սիրիայում: Fox News-ին տված հարցազրույցում այս մասին հայտարարել է ԱՄՆ փոխնախագահ Մայքլ Փենսը, գրում է ՏԱՍՍ-ը:
«Մենք ողջունում ենք ռազմական գործողությունների դադարեցումը և լիարժեք հրադադարի հույս ունենք: Բայց նախագահը հստակ հասկացրեց, որ առաջիկա օրերին Թուրքիայի նկատմամբ ավելի լայնածավալ պատժամիջոցներ կսահմանի: Դա նշանակում է, որ մենք հույս ունենք, որ հրադադարի ռեժիմ կհաստատվի»,- ասել է ԱՄՆ փոխնախագահը:
Հոկտեմբերի 14-ին, հիշեցնենք, ԱՄՆ նախագահ Դոնալդ Թրամփը հրամանագիր է ստորագրել Սիրիայում ռազմական գործողությունների հետ կապված Թուրքիայի նկատմամբ պատժամիջոցներ սահմանելու մասին:
Հիշեցնենք նաև, որ Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի բանակցությունների արդյունքներով ՌԴ ԱԳ նախարար Սերգեյ Լավրովը հայտարարել էր Սիրիայի հյուսիս-արևելքում Անկարայի «Խաղաղության աղբյուր» ռազմական գործողության դադարեցման մասին: Մնացյալը, ըստ Լավրովի, կախված կլինի քրդական կազմավորումները դուրս բերելու մասին համաձայնության կատարումից:
Բանակցությունների արդյունքում որոշվել է նաև Սիրիայում թուրքական գործողության սահմաններից դուրս ռուսական ռազմական ոստիկանության և սիրիական զինուժ տեղակայել:
