Հոկտեմբերի 27-ը կարող է կրկնվել ցանկացած պահի․ Արման Բաբաջանյան. ՏԵՍԱՆՅՈՒԹ

Նոր Հայաստանի նոր իշխանությունը պարտավոր է ցուցաբերել համապատասխան ու համարժեք քաղաքական կամք ու հանձնառություն՝ ձեռնամուխ լինելու Հոկտեմբերի 27-ի իրական ու ամբողջական բացահայտմանը: Դա մի կողմից հարգանքի տուրք կլինի Հոկտեմբերի 27-ի զոհերի հիշատակի առաջ, մյուս կողմից՝ միայն այդ դեպքում մենք կկարողանանք մտածել Հայաստանի զարգացման ու առաջընթացի մասին: Այս մասին ԱԺ-ում իր ելույթի ժամանակ ասաց պատգամավոր Արման Բաբաջանյանը։

Վերջինս իր ելույթի ժամանակ, մասնավորապես, նշեց․ «Մի քանի օր անց մենք նշելու ենք 1999 թվականի հոկտեմբերի 27-ի ոճրագործության 20-րդ տարելիցը, ոգեկոչելու ենք Հայաստանի նորագույն պատմության ամենազազրելի հանցագործության զոհերի հիշատակը: 20 տարի առաջ հենց այս դահլիճում մի խումբ ստահակներ գնդակահարեցին Հայաստանի Հանրապետության ընտրված ղեկավարությանը, այն ղեկավարությանը, որը վարչապետ Վազգեն Սարգսյանի և ԱԺ նախագահ Կարեն Դեմիրճյանի գլխավորությամբ Հայաստանի զարգացման իրական հույս էր արթնացրել հասարակության մեջ: 20 տարի առաջ հոկտեմբերի 27-ին գնդակահարվեց այդ հույսը, 20 տարի առաջ հոկտեմբերի 27-ին գնդակահարվեց Հայաստանի զարգացումը, 20 տարի առաջ գնդակահարվեց Հայաստանի պետությունը»:

Բաբաջանյանը նկատեց, որ Հոկտեմբերի 27-ի հետևանքները մենք չենք հաղթահարել մինչև օրս, որովհետև Հոկտեմբերի 27-ի ոճրագործությունը մեր պետության վրա թողել է ինչպես ներքին, այնպես էլ արտաքին քաղաքական լրջագույն ազդեցություններ, որոնք չեն հաղթահարվել անգամ 20 տարի անց:

«Մենք՝ որպես նոր Հայաստանի ԱԺ պատգամավորներ, որպես նոր Հայաստանի օրենսդիր իշխանություն, քաղաքական ու բարոյական պարտք ունենք Հոկտեմբերի 27-ի զոհերի հիշատակի առաջ: Մենք՝ իշխանություն, թե ընդդիմություն լինելով, պետք է կարողանանք կառուցել այնպիսի պետություն, արարել այնպիսի հայրենիք, որի մասին երազում էին Հոկտեմբերի 27-ի զոհերը՝ Վազգեն Սարգսյանի ու Կարեն Դեմիրճյանի գլխավորությամբ: Մենք պետք է կարողանանք մեր երկրի զարգացման ընթացքը վերադարձնել այն հանգրվանին, որում այն կանգ առավ հոկտեմբերի 27-ի դավադիր կրակոցներով: Մենք պարտք ու պատասխանատվություն ունենք նաև ապահովելու պայմաններ՝ Հոկտեմբերի 27-ի իրական ու ամբողջական բացահայտման համար: Ցավոք, այդ խնդիրն անգամ ձևակերպված չէ մեր քաղաքական օրակարգում»,- ընդգծեց պատգամավորը:

Մանրամասները՝ տեսանյութում։