27.04.2026 | 20:27
ՀՔԱՎ-ը ահազանգում է ընտրովի արդարադատության մասին․ քրեական վարույթ է նախաձեռնվել միայն Ուրիխանյանի հրապարակումների հիմքով
Ինչպե՞ս ստացվեց, որ ՀՀԿ-ի ձայները 1.5 տարվա ընթացքում 13 անգամ նվազեցին. մեկնաբանում է Շարմազանովը. ՏԵՍԱՆՅՈՒԹ
Քաղաքականություն
22.10.2019 | 13:00
ՀՀԿ մամուլի խոսնակ Էդուարդ Շարմազանովի համար հասկանալի է, թե ինչու 2017 թվականի ընտրություններին 770 հազար ձայն ստացած ՀՀԿ-ն մեկուկես տարի անց 13 անգամ քիչ ձայն ստացավ:
Այսօր լրագրողների հետ զրույցում պատասխանելով հարցին՝ ինչպե՞ս ստացվեց, որ մեկուկես տարում ՀՀԿ-ի ձայները 13 անգամ նվազեցին, Շարմազանովն ասաց, որ տրամաբանությունը նույնն է, ինչպես 2017 թվականի ընտրություններում Նիկոլ Փաշինյանի գլխավորած դաշինքի ստացած ձայները 13 անգամ ավելի պակաս էին 2018-ի ընտրություններին ստացած քվեներից:
«Եվ շեշտեմ, որ 2017 թվականի ապրիլյան ընտրությունները Նիկոլ Փաշինյանը և նրա «Ելք» խմբակցությունը չեն բողոքարկել: Եվ նա ընդունել է, որ նույն ՀՀԿ-ն այդքան ձայն է հավաքել: Մենք այսօր, ուզենք թե չուզենք, արտախորհրդարանական ամենակազմակերպված և ամենաշատ ձայն ստացած ընդդիմությունն ենք: Մենք 4-րդ քաղաքական ուժն ենք 11 ուժերի մեջ, որոնք մասնակցել են ընտրություններին»,- ասաց Շարմազանովը:
Նրա խոսքով՝ ՀՀԿ-ն, որպես կուսակցություն, գրեթե միակ այլընտրանքն է այսօրվա վարչակարգին. «Այսօր ԱԺ-ն ամբողջական ընդդիմադիր խմբակցություններ չունի: Ինձ համար ընդդիմադիրը նրանք են, ովքեր հայեցակարգային առումով չեն ընդունում և չեն ողջունել հեղափոխությունը: Այսօրվա խորհրդարանում թուղթ ու գրիչով ընդդիմադիր երկու կուսակցություններն էլ եղել են Նիկոլ Փաշինյանի կառավարությունում»:
Մանրամասները՝ տեսանյութում:
