«Ցանկացած ոլորտի ղեկավարի նայի, կարող են լինել օգնական կամ խորհրդական». Ծառուկյանը՝ նախարարներին. ՏԵՍԱՆՅՈՒԹ

ԱԺ ԲՀԿ խմբակցության ղեկավար Գագիկ Ծառուկյանը դժգոհ է «Իմ քայլը» խմբակցությունից, քանի որ, ըստ նրա, միասնական քննարկման չեն գնում։ Նա ԱԺ-ում լրագրողների հետ զրույցում նշեց, որ հեղափոխությունից անցել է 1.5 տարի, բայց որևէ ներդրում չկա, ավելին՝ ներդրումները ոչ թե ավելանում են, այլ պակասում։

«Բոլորը մտածում էին, որ հեղափոխությունը եղավ, առավոտից իրիկուն աշխարհի հայությունը գալու է, գումարները դնելու է, բայց այդ բոլորը պետք է հասկանան, թե ներդրման համար ինչ է պետք։ Ոչ միայն պետք է դատարկ խոսքեր ասել, այլ լիարժեք օրենք ու պայման պետք է ընդունել, մարդուն հնարավորություն ու արտոնություն պիտի տրվի, ոչ թե ինչ-որ ծանոթ դիմի, որ թուղթ է բերում, իրեն հարկերից ազատում են, բայց այսպես տնտեսություն չի կարող զարգանալ»,- ասաց նա։

Ծառուկյանը կարծում է, որ երկրում ներդրումներ ապահովելու համար հարկավոր է միջազային փորձն ուսումանսիրել, օրինակ՝ Վրաստանի, Բելառուսի և այլն։ Նա շեշտեց՝ ներդրողը պետք է իրեն վստահ ու պաշտպանված զգա։

«Պետք է ներդրողն իրեն ուժեղ, պաշտպանված զգա, թե չէ փողատեր մարդը կգնա, ուրիշ երկրում ներդրում կանի։ Չմոռանանք, որ սաղ գալու են, կոռուպցիան վերանալու է, տեսեք՝ հերթ են կանգնելու, էսօր 70 տոկոս ներդրում չի կատարվում։ Էլի ծանոթով, բարեկամով ես անում, որ ուզում ես օրինակ լինի, ինչ-որ շարժ լինի։ Այսօր հարցեր են բարձրացնում, բայց իրենց հարցերն ընդունելի են, բոլորը տաղանդավոր են, իրենք փորձառու են: Փորձառու չկա, որ իրա կյանքում քարը քարին չի դրել, բայց քայլել ա Նիկոլ Փաշինյանի կողքին ու պաշտոններ են տվել»,- ընդգծեց նա։

Ծառուկյանի գնահատմամբ՝ իշխանության նման գործելաոճի պարագայում երկիրը չի կայանա։ Նրա հիշեցրեց, որ վաղուց է ասել՝ այս մոտեցմամբ տնտեսական հեղափոխություն չի կայանալու:

«Պետք է իմանալ՝ այդ ոլորտում ով է աշխատել, ով փորձ ունի և այլն: Պարոն Փաշինյանն այսպես պետք է որոշում կայացնի, պետք է կապ չունենա ծանոթ ու բարեկամ, պետք է կապ չունենա կուսակցական պատկանելիություն։ Ցանկացած ոլորտի ղեկավարին մի հատ նայեք, իրական կյանքում իր ճանապարհն ու կատարած փորձը։ Հա՛, իրենք կարող են լինել օգնականներ, խորհդականներ, թող կողքից նայեն ու սովորեն, երբ փորձ ձեռք կբերեն, կաշխատեն»,- եզրափակեց Գագիկ Ծառուկյանը։

Մանրամասները՝ տեսանյութում:

Նարեկ Կիրակոսյան