Կատալոնիայի առաջնորդը հանդես է եկել անկախության նոր հանրաքվե անցկացնելու օգտին

Կատալոնիայի կառավարության ղեկավար Կիմ Տորրան կարծում է, որ անհրաժեշտ է ինքնավարության անկախության նոր հանրաքվե անցկացնել: ՏԱՍՍ-ի փոխանցմամբ՝ այս մասին նա հայտարարել է այսօր Կատալոնիայի խորհրդարանում ունեցած ելույթում:

«Եթե քվեատուփերի պատճառով մեզ դատապարտում են 100 տարվա բանտարկության, ապա պատասխանն ակնհայտ է. հարկավոր է քվեատուփեր տեղադրել ինքնորոշման հարցով քվեարկության համար»,- ասել է նա:

Տորրան, միաժամանակ, ընդգծել է, որ «դատարանը Կատալոնիայի առաջնորդին չի խանգարի շարունակել առաջ մղել նախաձեռնություններ, որոնք վերաբերում են շրջանի ինքնորոշմանը»:

Նշենք, որ նախօրեին Իսպանիայի Սահմանադրական դատարանը Տորրոյին նախազգուշացրել է քրեական հետևանքների մասին՝ ինքնորոշման իրավունքի հետ կապված դատական վճիռների խախտման դեպքում:

Մինչ այդ, Կատալոնիայում այս շաբաթվա սկզբից բողոքի ակցիաներ են անցկացվում: Ցուցարարների և իրավապահների միջև բախումների հետևանքով շուրջ 100 մարդ է տուժել, մեծ նյութական վնաս է հասցվել շրջանին: Այսօր առավոտյան էլ ցուցարարները փակել են որոշ ճանապարհներ և երկաթգծեր:

Ցույցերը սկսվել են այն բանից հետո, երբ Իսպանիայի Գերագույն դատարանը երկուշաբթի վճիռ կայացրեց անկախության հանրաքվեի կազմակերպմանը մասնակից կատալոնական քաղաքական գործիչների գործով՝ նրանց դատապարտելով մինչև 13 տարվա բանտարկության: Առավելագույն ժամկետը ստացել է ինքնավար մարզի կառավարության ղեկավարի տեղակալ Օրիոլ Ժունկերասը:

Հիշեցնենք, որ Կատալոնիայում թագավորության կազմից դուրս գալու շուրջ քվեարկությունը տեղի է ունեցել 2017 թվականի հոկտեմբերի 1-ին: Ի սկզբանե Մադրիդը հանրաքվեն ոչ լեգիտիմ էր որակել և հրաժարվել էր ճանաչել դրա արդյունքները: Նույն տարվա հոկտեմբերի 27-ին Կատալոնիայի խորհրդարանը հաստատեց անկախ հանրապետության հռչակման մասին բանաձևը, ինչին ի պատասխան՝ Իսպանիայի իշխանությունները գործի դրեցին Սահմանադրության 155-րդ հոդվածը, ինչը թույլ տվեց սահմանափակել շրջանի ինքնակառավարումը: