Էրիկ Գրիգորյանը պատասխանեց «Լիդիան Արմենիա» ընկերության տնօրենին. ՏԵՍԱՆՅՈՒԹ

Մի քանի օր առաջ «Լիդիան Արմենիա» ընկերության տնօրեն Հայկ Ալոյանն իր հարցազրույցում պնդել էր, որ շրջակա միջավայրի նախարար Էրիկ Գրիգորյանը համագործակցել է «Լիդիան Արմենիայի» հետ: Այսօր Կառավարության նիստից հետո տեղի ունեցած ճեպազրույցի ժամանակ լրագրողները նախարարից հետաքրրքվեցին, թե ի՞նչ համագործակցության մասին է խոսքը:

«Միգուցե նա միայն այն մասով է ճիշտ ասել, որ եզակի անձանցից մեկն եմ, ով ծրագիրը շատ լավ գիտի։ Ավելի քան տասը տարի ես տեղյակ եմ ծրագրից՝ ամենասկզբից ինչպես է սկսվել ու ինչպես է ընթանում։ Իսկ մյուս հարցը, թե աշխատել եմ իրենց հետ… երբևիցե ես որևէ հանքարդյունաբերական կազմակերպության համար չեմ աշխատել, չնայած վերջին տասը տարիների ընթացքում շատ առաջարկներ եմ ստացել՝ շատ մեծ հնարավորություններով ու աշխատավարձերով»,-պարզաբանեց նախարարը։

Էրիկ Գրիգորյանն ասաց, որ տարիներ առաջ աշխատել է բրիտանական մի կազմակերպության հետ, որն աշխարհի լավագույն խորհրդատվական կազմակերպություններից է, և իրենց մոտ եղել են նաև վերլուծություններ, որոնք արել է Լիդիանի, Զանգեզուրի, Ագարակի կոմբինատների համար։

«Բայց ես որևէ պարտավորություն չունեմ, ուղղակի զարմանալի է, թե ինչպես կարող են այդպիսի հայտարարություններ անել։ Նաև ինչ-որ կոռուպցիոն, այս տիպի ձևակերպումների էին տվել, շատ ծիծաղելի է այդ ամենը։ Եվ կարծում եմ՝ բոլորդ էլ շատ լավ հասկանում եք, թե ինչի համար են այդ հայտարարություններն անում»,- նշեց նախարարը:

Մանրամասները՝ տեսանյութում:

Նարեկ Կիրակոսյան