18.10.2026 | 19:32
«Աշխարհաքաղաքական լարվածության պայմաններում Երևանի համաժողովը հույս է ներշնչում»․ Շոմակեր. ՏԵՍԱՆՅՈւԹ
Իշխանության հանդեպ դրսևորված աննախադեպ բարձր վստահությունը չօգտագործվեց, երկրում խորքային փոփոխություն չենք տեսնում. Վարդան Այվազյան
Քաղաքականություն
16.10.2019 | 19:52
«Հայոց արարման հավաք» հասարակական կազմակերպությունը, որը վերջերս է ստեղծվել՝ չորս ամիս առաջ, հայտարարում է «Կոնսոլիդացիա պլյուս մեկ» շարժում սկսելու մասին։ Այսօր լրագրողների հետ հանդիպմանը կազմակերպության համահիմնադիրներից Վարդան Այվազյանը նշեց, որ իրենց նպատակն է՝ երկրում տեղի ունեցող հասարակական համալիր գործընթացների առողջացումը:
«Մենք քաջ գիտակցում ենք, որ առանց դրա պարզապես անհնար է պետական և հասարակական կյանքում արձանագրել որևէ առաջընթաց»,- հավելեց նա:
Այվազյանի խոսքով՝ նման նախաձեռնության անհրաժեշտությունն առաջացել է 2018 թվականի իրադարձություններից հետո:
«Այդ հեղափոխության արդյունքում իշխանության հանդեպ դրսևորվեց աննախադեպ բարձր վստահություն մեր հասարակության կողմից՝ արդեն գիտենք Ազգային ժողովի ընտրություններում ստացած ձայների տոկոսը, սակայն պետք է ցավով արձանագրենք, որ այդ աննախադեպ վստահությունը չօգտագործվեց, երկրում խորքային և ինստիտուցիոնալ փոփոխություն դեռևս չենք տեսնում»,- ասաց Վարդան Այվազյանը:
Նրա գնահատմամբ՝ այս մեկուկես տարվա ընթացքում մեր երկրում քաղաքական բանավեճը դրսևորվում է բովանդակության բացակայությամբ, փոխադարձ ժխտողականությամբ և անհանդուրժողականությամբ:
«Նշված խնդիրը լուծելու համար մենք հայտարարում ենք «Հայոց արարման հավաք» հասարակական կազմակերպության շարժման սկիզբը՝ «Կոնսոլիդացիա պլյուս մեկ», որի հիմնական նպատակն է մերժել երկրի քաղաքական և հասարակական կյանքում տիրող կեղծ օրակարգը: Կեղծ օրակարգի մեջ այսօր մտնում է համազգային խնդիրների խեղաթյուրումը, հասարակության բևեռացումը, ատելության մթնոլորտը, պետական ինստիտուտների արժեզրկումը, արտաքին քաղաքական մարտահրավերները, իրավունքի և պետության, արդարության և արդարադատության տարաբնույթ ընկալումն ու մեկնաբանությունը, ժողովրդավարություն երևույթի նենգափոխումը»,- հայտարարեց Այվազյանը:
Ինչ վերաբերում է շարժման «պլյուս մեկ»-ին, ըստ Վարդան Այվազյանի՝ «պլյուս մեկը» Հայ առաքելական եկեղեցին է, քանի որ կոնսոլիդացիան պետք է տեղի ունենա առաքելական եկեղեցու հովանու ներքո:
