13.01.2026 | 18:20
ԵՄ-ն խոստանում է պատժամիջոցներ կիրառել Իրանի նկատմամբ «սարսափելի զոհերի պատճառով»
Վահան Մարտիրոսյանն ընդունել է հայ-կանադական ՏՀՏ համաժողովի պատվիրակությանը
Տնտեսություն
03.10.2017 | 17:17
ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը հոկտեմբերի 3-ին ընդունեց Երևանում անցկացված հայ-կանադական ՏՀՏ համաժողովի պատվիրակությանը՝ Մոսկվայում Կանադայի դեսպանատան տնտեսական և առևտրային հարցերով նախարար-խորհրդական Անիկ Գուլեի գլխավորությամբ. տեղեկացնում է ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունը:
Նախարարն ընդգծեց հայ-կանադական համաժողովի կարևորությունը` համոզմունք հայտնելով, որ այն առաջին քայլն էր՝ բարձր տեխնոլոգիաների ոլորտում երկու երկրների միջև համագործակցությունն ապագայում ավելի խորացնելու և զարգացնելու համար։
Նա նշեց, որ ՏՀՏ ոլորտը Հայաստանում զարգանում է մեծ թափով, և կան բոլոր հնարավորությունները տեխնոլոգիական առաջատար երկիր դառնալու համար։
Անիկ Գուլեն մեկ անգամ ևս շնորհակալություն հայտնեց Վահան Մարտիրոսյանին համաժողովի անցկացմանն աջակցելու և այն հնարավոր դարձնելու համար։ Նա հույս հայտնեց, որ համագործակցությունը կլինի շարունակական։
Պատվիրակության անդամները, ովքեր ՏՀՏ ոլորտի տարբեր կազմակերպությունների ղեկավարներ էին, նախարարին ներկայացրին իրենց ընկերությունների գործունեությունը, առանձնահատկություններն ու արձանագրած հաջողությունները։
Քննարկվեցին նաև մի շարք ծրագրեր Հայաստանում կիրառելու տարբերակները, ինչպես նաև ՏՀՏ ոլորտի հայ մասնագետների կարողությունները համատեղ ծրագրերում ներգրավելու հնարավորությունները։
Նախարարը կարևորեց նաև մեր երկրում նոր տեխնոլոգիական կրթության զարգացումն ու ամրապնդումը և հայտնեց, որ անհրաժեշտություն կա հիմնելու տեխնոլոգիական համալսարան, որում կկենտրոնացվի ՏՀՏ ոլորտին անհրաժեշտ մասնագետների պատրաստումը։
Ներկայացնելով նախատեսվող «Ինժեներական քաղաքի» կառուցման ու տարածաշրջանային «Դատա կենտրոն»-ի հիմնման ծրագրերը՝ Վահան Մարտիրոսյանն առաջարկեց, որպեսզի կանադական ընկերությունները ևս իրենց մասնակցությունն ունենան դրանցում։
Պայմանավորվածություն ձեռք բերվեց, որպեսզի նախարարության համապատասխան ոլորտների ներկայացուցիչները շարունակեն երկկողմ համագործակցության շուրջ հետագա քննարկումները:
