Քաղաքականություն
14.10.2019 | 20:44Ես չեմ հավատում, որ հայտարարությունները կարող են պառակտում մտցնել, հնարավոր չէ պառակտել Արցախն ընդհանուր առմամբ, այն միասնական է՝ անկախ տարբեր մարդկանց հայտարարություններից ու տեսակետներից։ Այս մասին այսօր Շուշիում լրագրողների հետ զրույցում նշեց «Ազատ հայրենիք» կուսակցության նախագահ Արայիկ Հարությունյանը՝ անդրադառնալով Արցախի Անվտանգության խորհրդի նախկին քարտուղար Վիտալի Բալասանյանի վերջին հայտարարությանը։
Նրա խոսքով՝ այսօր Արցախի և Հայաստանի իշխանությունների միջև չհասկացվածության խնդիր չկա։
Անդրադառնալով ՀՀ վարչապետ Նիկոլ Փաշինյանի՝ Արցախի բանակցային գործընթացում վարած քաղաքականությանը և այն հայտարարություններին, թե գործընթացը պետք է եռակողմ լինի, Արայիկ Հարությունյանը նշեց. «Դա ոչ միայն Նիկոլ Փաշինյանի հայտարարությունն է, տրամաբանությունն էլ է հուշում: Եթե որևէ կողմի չբավարարի, հարցը չի լուծվի։ Եթե որևէ մեկի համար ընդունելի չլինի, հարցը չի լուծվի։ Մենք 1994 թվականի մայիսի 12-ից ամեն օր սպասում ենք պատերազմի»:
Խոսելով Ժիրայր Սեֆիլյանի հայտարարության մասին, թե Արցախը Հայաստանի մարզն է և վերջ, Արայիկ Հարությունյանն ընդգծեց. «Մենք երազում ենք, որ Արցախը դառնա Հայաստանի մարզը, բայց դա պետք է լինի քաղաքականությանը և միջազգային նորմերին համպատասխան։ Դա մեր երազանքն է»։
Մանրամասները՝ տեսանյութում։
Նելլի Մելքոնյան
