13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Արցախի միջազգային ճանաչումն առանցքային ներդրում կունենա Հարավային Կովկասում խաղաղության և անվտանգության ամրապնդման գործում. ԱՀ ԱԳ նախարար
Քաղաքականություն
11.10.2019 | 16:09
Արցախն իրավունք է ունեցել ստեղծելու անկախ պետություն՝ ինքնորոշման իրավունքի իրացման կարգով և անջատման իրավունքին համապատասխան, որպես պաշտպանության միջոց՝ Ադրբեջանի կողմից իրականացվող պարբերական խտրականության, մարդու իրավունքների զանգվածային խախտումների, էթնիկ զտումների պայմաններում:
«Արցախպրես»-ի թղթակցի հաղորդմամբ՝ այս մասին այսօր Ստեփանակերտի մշակույթի և երիտասարդության պալատում ընթացող «Համագործակցություն հանուն արդարության և խաղաղության» խորագրով Արցախի բարեկամների համաժողովի ժամանակ իր «Արցախի Հանրապետության միջազգային ճանաչումը որպես տարածաշրջանի կայունության և խաղաղության գրավական» ելույթում ասել է ԱՀ արտաքին գործերի նախարար Մասիս Մայիլյանը:
Նրա խոսքով՝ պաշտոնական Բաքվի երկխոսությունից հրաժարվելու և հակամարտությունն ուժով լուծելու անդադար փորձերի պայմաններում, պետության ստեղծումն արցախահայության գոյատևումն ապահովելու առավել օպտիմալ միջոցն էր:
«Երկար ժամանակ այն կարծիքն էր գերիշխում, որ Ադրբեջանի հետ խաղաղ համաձայնագիրը ճանապարհ կհարթի Արցախի միջազգային ճանաչման համար: Սակայն հենց սկզբից խաղաղ կարգավորման գործընթացը բախվել է անհաղթահարելի խոչընդոտի՝ Ադրբեջանի կողմից առճակատման տրամաբանությունից հրաժարվելու չկամության հետ: Ամեն կերպ խոչընդոտելով լիարժեք ձևաչափով բանակցությունների վերականգնմանը, հրաժարվելով վստահության ամրապնդման միջոցների իրականացումից, հրահրելով սպառազինության մրցավազք, շանտաժի ենթարկելով նոր պատերազմի վերսկսմամբ, փորձելով նենգափոխել հակամարտության կարգավորմամբ զբաղվող ԵԱՀԿ Մինսկի խմբի համանախագահների՝ ԱՄՆ-ի, Ֆրանսիայի և Ռուսաստանի միջնորդական ջանքները: Ավելին, համայն հայությանն Ադրբեջանի թիվ մեկ թշնամի հայտարարելը, Հայաստանի և Արցախի նկատմամբ լիակատար մեկուսացման քաղաքականության իրագործումը, հայերի հանդեպ ատելության շարունակական քարոզչությունն ավելի են խորացնում կողմերի միջև առկա անջրպետը և ավելի են հեռացնում բանակցությունների միջոցով հակամարտության վերջնական կարգավորմանը հասնելու հնարավորությունը»,-մասնավորապես ասել է Մ. Մայիլյանը՝ նշելով, որ այդ ամենի հետ մեկտեղ ջանքեր են գործադրվում Արցախի միջազգային կապերի և հարաբերությունների ընդլայնման և խորացման ուղղությամբ:
ԱՀ ԱԳ նախարարն իր ելույթում ընդգծել է, որ ԱՀ ճանաչումը չի խափանում ադրբեջանա-ղարաբաղյան հակամարտության խաղաղ կարգավորմանն ուղղված միջազգային միջնորդների ջանքերը: Ինչպես բազմիցս նշել են միջազգային միջնորդները՝ Արցախի քաղաքական կարգավիճակը պետք է որոշի իր բնակչությունը: Արցախի միջազգային ճանաչումը կապահովի խաղաղ գործընթացի անշրջելիությունը: Այն կարևոր է նաև մարդու իրավունքների պաշտպանության տեսանկյունից: Արցախի քաղաքացիների առօրյա կյանքի վրա հակամարտության ազդեցության նվազեցման անհրաժեշտությունը ժամանակի պահանջ է:
Անդրադառնալով համաժողովին՝ Մ. Մայիլյանն ասել է, որ այն վստահություն է ներշնչում վաղվա օրվա հանդեպ և ինքը հավատում է փոխշահավետ համագործակցության հեռանկարներին:
«Այսօր մենք վստահ նայում ենք ապագային և համոզված ենք, որ Արցախի միջազգային ճանաչումն առանցքային ներդրում կունենա Հարավային Կովկասում խաղաղության և անվտանգության ամրապնդման գործում»,- ավելացրել է Մ. Մայիլյանը:
