Աբխազիայի կառավարությունը վայր է դրել լիազորությունները

Հոկտեմբերի 10-ին Աբխազիայի նախագահ Ռաուլ Խաջիմբան կառավարության նիստ է անցկացրել, որի ընթացքում գործադիրի անդամները հրաժարական են ներկայացրել: Այս մասին գրում է «Սպուտնիկ Աբխազիա»-ն:

Օրենսդրության համաձայն՝ Աբխազիայի նորընտիր նախագահը Կառավարության նիստը պետք է անցկացնի երդմնակալության արարողության հաջորդ օրը: Նիստում կոլեգիալ որոշում է կայացվել կառավարության լիազորությունները դադարեցնելու մասին:

Նիստից առաջ երկրի վարչապետ Վալերի Բգանբան կառավարության անդամներին շնորհակալություն է հայտնել աշխատանքի համար: Ընդ որում, վարչապետը նշել է, որ կառավարության աշխատանքում եղել են թերություններ:

«Մենք դրանք չենք թաքցրել, մենք դեռ շատ անելիքներ ունենք, առջևում ամենաբարդ խնդիրներն են: Պետք է հասկանանք, թե ինչ պիտի անենք, որպեսզի մեր հնարավորություններն աճեն: Մենք բազմիցս ենք խոսել այդ մասին կառավարության անդամների հետ»,- ասել է Խաջիմբան:

Երեք ամսվա ընթացքում երկրի նախագահը պետք է ներկայացնի նոր վարչապետին, այնուհետև կառավարության ղեկավարը նախագահին պետք է կառավարության անհատական կազմի վերաբերյալ առաջարկություններ ներկայացնի: Մինչև կառավարության նոր կազմի ձևավորումը, նախկին վարչապետն ու նախարարները կկատարեն իրենց պարտականությունները որպես պաշտոնակատար։

Աբխազիայի նախագահի երդմնակալության արարողությունը տեղի է ունեցել հոկտեմբերի 9-ին:

Հիշեցնենք, որ Ռաուլ Խաջիմբան հաղթանակ է տարել Աբխազիայի նախագահական ընտրությունների երկրորդ փուլի արդյունքներով՝ հավաքելով ձայների 47.39 տոկոսը, իսկ նրա մրցակից Ալխաս Կվիցինիան 46.17 տոկոս ձայն է ստացել: