Քաղաքականություն
09.10.2019 | 20:23
ՀՀ Կառավարությունը վաղը կքննարկի Տրդատ Սարգսյանին Վայոց ձորի մարզպետի պաշտոնից ազատելու հարցը: Այս մասին տեղեկանում ենք կառավարության կայքից:
Սեպտեմբերի 18-ին, հիշեցնենք, Վայոց ձորի Եղեգնաձոր քաղաքում աղմկահարույց միջադեպ էր տեղի ունեցել, որի ընթացքում ծեծվել և անգիտակից վիճակում ՀՀ ՊՆ Կենետրոնական կլինիկական հոսպիտալի վերակենդանացման բաժանմունք էր տեղափոխվել ՊՆ փոխգնդապետ Արա Մխիթարյանը:
Նշված միջադեպին մասնակցություն ունենալու համար մեղադրանք է առաջադրվել և կալանավորվել Վայոց ձորի մարզպետի օգնական Հարություն Գրիգորյանը: Քննչական կոմիտեն քննում է նաև նշված միջադեպին մարզպետի մասնակցության հանգամանքը:
Սեպտեմբերի 24-ին տարածած հայտարարությունում Սարգսյանը հերքում էր միջադեպին իր մասնակցությունը. «Ինչպես և հայտնել եմ նախկինում, դեպքի ժամանակ եղել եմ տանը: Նախաքննությունն իրականացնող մարմնին ներկայացրել եմ այս փաստը հիմնավորող ապացույցներ։ Վստահ եմ, որ կիրականացվի օբյեկտիվ քննություն և մեղավորները կպատժվեն։ Այնուամենայնիվ, ևս մեկ անգամ հերքելով որևէ առնչությունս այս դեպքին, բայց դրանից առավել կարևորելով նոր Հայաստանում քաղաքական էթիկայի ու քաղաքական պատասխանատվության կայացումը՝ հայտնում եմ, որ որոշում եմ կայացրել վայր դնել Վայոց ձորի մարզպետի լիազորություններս այսօր մեկնարկող լայնածավալ ռազմավարական զորավարժությունների ավարտից հետո»,- գրել էր մարզպետը։
Տրդատ Սարգսյանը մի քանի օր առաջ ազատման դիմում էր ներկայացրել, որը փոխանցվել էր վարչապետի աշխատակազմին:
Նարեկ Կիրակոսյան
