09.10.2026 | 15:23
ԱԱԾ-ն հերքում է Մեղրիում ադրբեջանցիների լինելու լուրը // Ադրբեջաներեն երգ՝ Փաշինյանի տեսանյութում․ ԼՈՒՐԵՐ
Վայոց ձորի մարզպետի ազատման դիմումը վարչապետի աշխատակազմում է
Քաղաքականություն
07.10.2019 | 18:54
Վայոց ձորի մարզպետ Տրդատ Սարգսյանն այսօր հրաժարականի դիմում է գրել և ներկայացրել տարածքային կառավարման և ենթակառուցվածքների նախարարություն: Այս մասին Factor.am-ին փոխանցեց նախարարության մամուլի խոսնակ Արմինե Մուրադյանը: Նա մեզ հետ զրույցում ասաց, որ նախարարությունից էլ դիմումն արդեն փոխանցվել է վարչապետի աշխատակազմ:
Հիշեցնենք, որ սեպտեմբերի 24-ին Վայոց ձորի մարզպետ Տրդատ Սարգսյանն իր ֆեյբուքյան էջում հայտնել էր, որ որոշում է կայացրել վայր դնել Վայոց ձորի մարզպետի լիազորությունները սեպտեմբերի 24-ին մեկնարկած լայնածավալ ռազմավարական զորավարժությունների ավարտից հետո։ Հայտարարության մեջ, մասնավորապես, ասվում էր.
«Հաշվի առնելով օրեր առաջ Եղեգնաձորում տեղի ունեցած ցավալի միջադեպը՝ անհրաժեշտ եմ համարում ներկայացնել հետևյալ պարզաբանումները․ Ինչպես և հայտնել եմ նախկինում, դեպքի ժամանակ եղել եմ տանը․ նախաքննությունն իրականացնող մարմնին ներկայացրել եմ այս փաստը հիմնավորող ապացույցներ։ Վստահ եմ, որ կիրականացվի օբյեկտիվ քննություն և մեղավորները կպատժվեն։ Այնուամենայնիվ, ևս մեկ անգամ հերքելով որևէ առնչությունս այս դեպքին, բայց դրանից առավել կարևորելով նոր Հայաստանում քաղաքական էթիկայի ու քաղաքական պատասխանատվության կայացումը՝ հայտնում եմ, որ որոշում եմ կայացրել վայր դնել Վայոց ձորի մարզպետի լիազորություններս այսօր մեկնարկող լայնածավալ ռազմավարական զորավարժությունների ավարտից հետո»։
Նարեկ Կիրակոսյան
