ՌԴ-ն առաջարկում է Ադրբեջանում ատոմակայան կառուցել. ի՞նչ են քննարկել Պուտինն ու Ալիևը Սոչիում

Ռուսաստանի և Ադրբեջանի նախագահների՝ Սոչիում տեղի ունեցած հանդիպման ժամանակ քննարկել են հիմնականում երկու երկրների առևտրատնտեսական հարաբերություններին առնչվող հարցեր: ՌԻԱ Նովոստիի փոխանցմամբ՝ Պուտին-Ալիև հանդիպումից հետո «Ռոսատոմ»-ի գլխավոր տնօրեն Ալեքսեյ Լիխաչովը հայտարարել է, թե ՌԴ-ն Ադրբեջանին առաջարկել է ատոմակայան կառուցել։

«ԱԷԿ-ը կլինի այնպիսին, որը կընտրի մեր ադրբեջանցի գործընկերը: Մենք առաջարկում ենք հզոր կայան»,- ասել է Լիխաչովը:

Նա հավելել է, որ Ադրբեջանի առանձնահատկությունը նրանում է, որ էլեկտրաէներգիայի սպառումն այստեղ մեծապես ավելանում է. «2018 թվականին ադրբեջանցիները 14 տոկոսով ավելացրել են էլեկտրաէներգիայի սպառումը, որը շատ է»,- ասել է Լիխաչովը։

Ինչ վերաբերում է քննարկված այլ հարցերի, ռուսական աղբյուրների փոխանցմամբ՝ Պուտինն ասել է, որ ՌԴ-ի և Ադրբեջանի հարաբերությունները շարունակում են զարգանալ:

«Չնայած որոշակի դադար է եղել մեր անձնական շփումներում, մեր երկրների միջև հարաբերությունները շարունակում են զարգանալ։ Ամրապնդվում են առևտրատնտեսական կապերը, նախորդ տարի առևտրաշրջանառությունը կազմել է 2.5 մլրդ դոլար։ Նկատի ունեմ նաև այն նախագծերը, որոնց հեղինակն Ադրբեջանի նախագահն է: Մենք մեր կողմից անում ենք ամեն ինչ, որ այդ կոնկրետ խոշոր նախագծերն իրագործվեն»,- նշել է Վլադիմիր Պուտինը։

Ալիևն իր հերթին գոհունակություն է հայտնել ՌԴ նախագահի հետ հանդիպման հնարավորության համար՝ երկու երկրների հարաբերությունները բնութագրելով որպես ռազմավարական և գործընկերային:

«Մեզ համար Ռուսաստանը կարևորագույն գործընկեր, ընկեր ու լավ հարևան է: Մեզ համար թանկ են այդ հարաբերությունները։ Համոզված եմ, որ այսօրվա քննարկումը լավ հիմք կլինի մեր կապերի հետագա ամրապնդման համար»,- ասել է Ալիևը:

Հիշեցնենք, որ հոկտեմբերի 1-ին ՌԴ նախագահը Երևանում էր, որտեղ մասնակցեց ԵՏՄ բարձրագույն տնտեսական խորհրդի նիստին, ինչպես նաև հանդիպեց ՀՀ վարչապետ Նիկոլ Փաշինյանին:

Էմմա Չոբանյան